Parlamentario pa fraccion di AVP, sr Robert Candelaria a mustra cu Minister di husticia a papia recientemente di e dominio di idioma Hulandes di polis cu a causa hopi desgusto den Cuerpo. “Ami sa cu e idioma Hulandes pa traha proces-verbaal y mutaties cu rapporten ta un reto pa nos tur pero minister mester pone tur cos den contexto prome cu e papia.

Nos polisnan actual ta haña durante nan opleiding e idioma Hulandes na nivel di MBO. Polisnan cu ta riba caya pero tambe esunnan den recherche, ta wordo hopi ocupa cu ‘schriftelijk werk.’ Gran mayoria di loke un polis haci, mester wordo documenta y na Hulandes. Esaki ta rekeri hopi tempo y e mester sosode den cierto caso bou hopi stress. Leynan ta mara e agente di polis na hopi deadlines y e mester cumpli cu nan.

Awor ta un cos pa minister señala cu idioma ta un challenge pa hopi, pero ta un otro cos pa lag’e te eynan, ya cu asina bo ta crea e impresion cu bo no ta na banda di bo hendenan y cu nan no por conta cubo.

 

Mi ta kere c’un minister di husticia mester conoce y compronde e materia prome cu e papia over di dje. E por crea disgusto cerca e polisnan cu ta traha hopi duro y ta haña poco reconocimento pa nan trabounan. E trabou di polis ta ‘ondankbaar werk’ hopi biaha. Masha poco bo ta haña un danki. Bo ta traha duro luchando pa husticia.

Ora un polis haña su mes cu un caso, casi semper ta pasobra tin un problema y tur presente den e problema y eunsnan rond di e problema, ta spera cu e polis ta resolve e situacion den nan fabor. Pues semper lo tin hende cu ta keda desapunta of rabia. Riba esey erornan den trabou tambe sa tuma luga pero tur polis tin cu carga esey ora un faya. Masha poco un hende ta sali pa dilanti y bisa cu e si ta aprecia of gradici polis pa loke el a haci.

Awor si e minister di husticia cu ta e mandatario maximo den husticia tambe ta para contra bo,  si ta tristo. Ta bon pa recorda e minister cu Cuerpo Policial mester di mas polis, mester bin un re-evaluacion di tareanan policial y mester bin un re-alocacion di personal y placa segun e prioridadnan cu tin.

Por ehempel, awor cu nos fronteranan ta vulnerabel, mester pone mas hende eynan. Tur esaki e minister mester ehecuta, y no djis para na banda y señala cu e idioma ta un challenge. Bin cu solucion. No laga e polis na caya. Esey si nos no ta mira nada di dje.”

 

Regla pago di licencianan

“Nos sa cu polis ta traha hopi cu computer y diferente software. E softwarenan aki ta rekeri pa paga pa nan licencianan, si no nan no por wordo uza mas. Awor no ta un of dos, pero diferente di nan mester wordo paga. E puntonan aki ta afectando e trabou di diferente departamento di polis seriamente, haciendo nan menos eficiente pero minister no ta alocando placa pa e cosnan aki.

Na luga di percura pa regla e casonan serio aki, minister ta celebra cu el a laga pone WiFi na un warda di polis. Mi ta bolbe bisa, cu mi ta haña bon cu esaki a tuma luga, pero WiFi ta algo normal na cualkier tienda of hasta fastfood. Esaki no ta algo pa celebra.

Mester paga tur licencia pa polis y no laga nan bay y confia cu polis lo haña un manera pa sigui traha tog.

Ni tampoco no ta algo pa celebra cu a pone un man di verf na un bariopost existente y habri esaki pa algun ora pa dia. Pueblo mester di solucionnan real y no pleisters pa issues real y window dressing pa susha pueblo su wowo.

Un bariopost no ta un warda di polis. Ehempelnan di solucionnan real ta cu mester bin cu campaña pa haya cu mas polis. Un apelacion na minister ta pa maske ta traha riba esun promesa di campaña aki. Purba cumpli cune aunke ta laat,” Parlamentario Robert Candelara di fraccion di AVP a mustra.