Algun aña atras, tur hende por corda con e actual prome minister Evelyne Wever Croes y e actual minister di finansa, Xiomara Ruiz Maduro, a biaha pa Hulanda c’un rapport cu nan mes a hinca den otro, cu a carga e titulo di ‘Feestvierend ten ondergaan’ cual nan a parti pa tur parlamentario Hulandes y politiconan cu nan por a topa, Arthur Dowers di fraccion di AVP ta mustra.
Ta mesun duo aki a sinta roga y pidi gobierno di Reino pa please interveni na Aruba contra gobierno di AVP, pa please impone un comision di supervision, esta CFT manera tabatin na Corsou y Sint Maarten y a regresa Aruba y a sigui manda mensahe pa Hulanda manda CFT Aruba.
“No ta prome biaha mi ta bisa e cos aki, pero Aruba tin un minister di finansa cu no sa algo di cifra, e no sa con pa atende cu e situacion financiero di e pais y e unico gran solucion cu nan a brinda te na e momentonan aki, ta medida tras di medida.
Minister Ruiz Maduro continuamente hunto cu su lider Evelyne tabata den contacto c’un parlamentario cu ta contra Aruba pa logra haya CFT bin Aruba y controla nos gobierno.
Wel CFT a bin y awor ta e propio minister Xiomara Ruiz Maduro tin cu sinta cu e comision aki y duna splicacion riba su propio maneho y esun di e gobierno di prome minister Evelyne Wever Croes y kico nos ta mira cu segun Ruiz Maduro, CFT no tin gevoel, no tin respet pa memoria di dos criatura kendenan a fayece debi na violencia domestico.
Ora cu tuma nota di e splicacion cu Minister Ruiz Maduro a trece dilanti e siman aki riba e hecho cu CFT no ta satisfecho cu presupuesto 2019, e ta rabia y ta sapatia sin bin cu argumento valido y logico pa e fayonan cu CFT ta mira den su presupuesto.
Pa colmo di e mesun crisisplan cu Xiomara ta papia di dje, CFT kier mas claridad riba miyones di florin cu tin mas c’un aña caba poni un banda y ningun hende sa kico gobierno ta bay haci cu e placa aki.
Ta pregunta logico, ta pregunta normal pero cu ta irita e minister di finansa pa falta di su capacidad y falta di vision financiero y economico cu e no por aclaria e situacion den un forma aceptabel pa CFT cu ya ta di tres ocasion ta pidi gabinete Wever Croes e mesun claridad riba su maneho di gasto y entrada di gobierno.
A impone medida sin misericordia riba pueblo, a introduci e prome serie di reforma fiscal cu a caba di manca economia di nos pais cu ya nan a manca caba cu aumento di BBO y ta mas cu claro cu CFT kier sa kico ta pasando cu tur e extra entradanan aki cu gobierno ta rancando for di pueblo.
Pa un minister di finansa purba di sconde tras di e drama di dos criatura, tras di muchanan maltrata y abusa, sconde tras di muhenan cu ta wordo maltrata, ta realmente algo insolito pero cu na mes momento ta mustra su incapacidad di haci un trabou cu e no por haci.
Mi a yega di bisa cu minister Ruiz Maduro ta bay tur fiesta cultural, awor ta den parada y ta jump den tur actividad cu e por y aparentemente e no kier pa CFT stroba su persona di gosa di su bida manera semper el a haci.
E pais por wel di sufri e consecuencianan di su mal maneho y di su falta di vision pero cu Xiomara tin cu baila y jump ta for di cualkier discusion na e momentonan aki.
Ta bon pa minister di finansa y prome minister Evelyne Wever Croes realisa cu nan a logra di gaña pueblo di Aruba cu cantidad di promesa falso, cu nan lo drecha finansa publico sin medida, cu nan lo baha prijs di awa y coriente caminda pa colmo e promesa di haya gasolin mas barata pa pueblo, ayera a bolbe aumenta cu ta otro sla pa entrada di nos pueblo pero cu CFT e flie ey no ta subi,” Parlamentario Arthur Dowers a declara.
