Ora Mike Eman y AVP ta papia, Evelyn ta scucha, ya cu e no por biba sin AVP y sin Mike caminda semper cu Evelyn papia, nomber di Mike mester ta den su boca.
Miembro di partido AVP, sr Melvin Tromp a mustra cu esaki a keda demostra dialuna mainta ora cu den oranan tempran di mainta, e lider di AVP a dirigi su mes na pueblo relaciona cu otro pakete di medida pisa cu ta na caminda.
Apenas un ora despues cu Mike Eman a caba cu su conferencia di prensa, Minister Presidente Evelyn Wever Croes ta reacciona riba e lider di AVP indicando cu e ta hasta lanta mainta y scucha y pensa riba su rival politico.
“Loke ta mas impactante ora cu scucha Prome Minister Evelyn Wever Croes papia di sinceridad, caminda e ta sugeri pa Mike Eman ta sincero cu pueblo, tur hende ta puntra ta di unda e ta saca e curashi aki, ya cu no ta mesun Evelyn aki a a priminti pueblo solucion financiero sin medida?
No ta mesun Evelyn di MEP aki y su gobierno a priminti pueblo un gobierno di shete minister pero awe nan ta casi 10 ya cu ta loke Otmar Oduber cu tin dos asiento a exigi esaki?
Ta mesun Evelyn aki su gobierno a priminti pueblo reduccion di tarifa di awa y coriente, reduccion di gasolin pero den prome lunanan, a aumenta accijns riba gasolin y awor cu su pakete nobo di medida, pueblo ta bay ta garantisa un aumento di prijs di awa y coriente.
Tambe no ta mesun Evelyn aki y su gobierno a sigura pueblo cu lo elimina hedging asina cu e drenta den gobierno pero mester a a bira hedge rapidamente y awe cu prijs di bari di petroleo a baha drasticamente, Evelyn su hedging no ta permiti pueblo saca probecha di e reduccion aki!
No ta un Minister di Evelyn su gobierno a sigura y priminti pueblo cu lo aumenta di salario minimo ya cu e ‘bestaandsminimum ta mucho mas halto cu cu awendia un famia di cuater no por biba cu 2000 pa luna.
Ta Evelyn e Prome Minister tambe a sigura pueblo cu si tin 1% di probabilidad, e lo habri e refineria di San Nicolas bek, ya cu e tin cantidad di compania para den rij ta warda pero awe e mes a tuma yabi di e refineria y ta laga cera e refineria.
Simplemente nos ta conclui cu Evelyn no por papia di sinceridad sigura ora cu e ta un persona no sa kico nifica sinceridad.
Den su afan pa sconde su medidanan, awor Evelyn ta papia di prestamo cu gobierno di AVP a haci y cu su gobierno tin cu paga bek pero na 2009 gobierno di MEP a laga e pais aki na rand di bancarota, c’un fondo di pensioen yegando su fin, cu scolnan tur decai y muchanan sin proteccion.
Un infrastructura cu ya no tabata cumpli cu exigencia di comunidad y un centro di Oranjestad domina pa chollernan pero caminda e unico cu a probecha di centro di ciudad e tempo ey, tabata un famia di Prome Minister cu huurmento di un hotel cu tabata den mal estado y afgekeurd pa DOW.
E tempo ey gobierno di MEP a laga un pueblo acosa pa BBO cu a percura pa mas pobresa y hendenan sin trabou, cu problemanan tur caminda, cu trahadonan publico sin haya loke nan tabatin derecho ariba.
Evelyn tin cu corda y mester por corda tambe cu, den e placa cu gobierno di AVP a presta pa drecha e pais, tabatin e suma di 23 miyon inclui, cu ta placa cu su famia a saca for di caha di pueblo cu huurmento di edificionan, cu diferente contract lucrativo y otro maniobranan financiero haci pa gobierno di MEP pa enrikece famia y amigonan.
Un prestamo cu tambe a yuda pa cubri miyones cu oficina di Papa a saca for di caha di gobierno, caminda miyones ta cay pa su yiu muhe kende tambe tabata traha cu e oficina di Papa.
Awe Evelyn ta birando un declaramado di poesia, caminda den un idioma amoroso, ta trata di convence pueblo cu mas medida ta na caminda y cu pueblo tin cu haya esaki normal ya cu despues cu su gobierno a ranca 260 miyon caba, su gobierno tin mester saca 100 miyon mas den presupuesto nobo.
TUR hende cu scucha Evelyn papia dialuna mainta, a realisa cu na ningun momento ni un solo bes, Evelyn a duna pueblo algo, bek, no a duna pueblo sikiera un florin bek, no a duna pueblo un aumento di onderstand, tampoco un aumento di reparatie toeslag, ni sikiera un aumento di salario minimo.
Evelyn no a bin dilanti y bisa cu awor cu el a saca miyones for di WEB, e prijs di awa y coriente ta bay baha pa pueblo pero lamentablemente esakinan lo subi ainda mas pa motibo di miyones cu Evelyn su gobierno a saca for di e compania di pueblo aki
Evelyn tin cu realisa su mes bon realmente cu e UNICO SOLUCION REAL cu e por duna pueblo awor aki, ta di bay Gobernado y entrega retiro di su gabinete y salba pueblo asina di e desaster di medida cu su gobierno kier introduci den proximo dianan.
Bay laga gobernacion pa hendenan cu sa goberna, hendenan cu tin pueblo na pecho y kendenan tin solucion pa pueblo,” Melvin Tromp di partido AVP a declara.
