Trabou di un prome-ministro ta pa informa bo pueblo corecto. Fuera di esei abo ta e Ministro encarga cu Oficina di Calamidad, y ta dirigi reunionan en especial ora un ciclon tropical ta un peligro pa Aruba, pues bo mester sa miho. Ta di lamenta cu bo no sa cu Aruba ta na e parti zuid di e faha di horcan pues no pafor manera bo a mal informa den exterior y despues telearuba ta pase tambe na Aruba. Fuera cu bo ta pone expertonan den exterior kere cu tur hende na Aruba tin e mesun nivel abou di educacion scientifico manera bo, bo ta hasi bo mesun pueblo mas bobo cu bo mal informacionan. Danki Dios cu awendia, hopi datos ta disponibel pa tur persona educa su mes y asina por questiona, ora algo ta zona straño.
Durante mi periodo como Minister encarga cu Meteo, mi a puntra e director e tempo ey (unico meteorologo na Aruba) pa confirma cu National Hurricane Center e ponencia di Hurricane Belt, esaki pasobra hopi informacion confuse tocante faha di horcan tabata bai rond riba internet. E advies di Hurricane Center tabata mescos cu loke Meteo Aruba y antes Meteo Antias a indica. Pues cu Aruba, Curacao y Bonaire ta na parti zuid di e faha di horcan y no pafo ! Pues e theoria nobo cu bo kier impone ta eroneo!
Adjunto mi ta pone un imagen di tur depresion tropical y tormenta tropical y horcan cu a pasa den vecindario di Aruba, pa bo mes por wak. E datos ta obtenible riba https://coast.noaa.gov/hurricanes/.
E datos aki ta indica tur ciclonan- tropical cu a pasa dentro di 65 milla nautico di Aruba desde aña 1842. Pues si Aruba lo ta pafo di e faha di horcan, anto lo nos no a wak niun datos pa Aruba.
Masha facil Prome Ministro por a bai wak riba website di Meteo Aruba, y tuma nota cu Meteo Aruba ta indica cu Aruba ta na e parti zuid di e faha di horcan ( http://www.meteo.aw/climate.php).
Tambe por a hasi uso di e website di Meteo Korsou, unda tin un rapport extenso cu tambe ta indica cu e islanan ABC ta na e parti zuid di e faha di horcan y no pafo (http://www.meteo.cw/Data_www/pdf/pub/Hurricanes%20and%20Tropical%20Storms%20DC_2018.pdf).
Mas ainda den e mesun website tin datos climatologico cu ta indica cu cada 25 aña un tormenta tropical fuerte ta pasa dentro di 75 milla nautico di Corsou i cada 46 aña un horcan por pasa dentro di 75 miya nautico di Corsou. Pues claramente e islanan ABC no ta pafor di e faha di horcan.
Awo e pregunta ta cu si pa algo asina simpel, bo a decidi di bai gaña den exterior, Dios lo sa ki mas bo ta gaña o imagina tur dia.
Un conseho dimi, na bo persona cu no tin niun educacion scientifico, lo ta miho pa bo informa bo mes corectamente prome bo papia locura/bobedad den exterior y tuma contacto cu bo expertonan na Aruba. Lamentablemente e director di Meteo cu ta un experto meteorologo a wordo poni un banda. Bo colega Ministro Romero a decidi pa pone un persona cu un dienstverleningscontract como hefe interino, pa motibo personal. Mi a tuma nota tambe cu un proyecto grandi cu fondonan di TPEF pa simulacion di lama a muri un morto forza dor di Minister Romero. E pregunta ta keda e ora cu si esaki ta considera como un acto integro, unda hopi placa di pueblo pa un proyecto pa alerta temprano y scientifico ta wordo elimina paso e ta un Proyecto di gobierno anterior.
Al final, segun mi miho bo keda Aruba den lugar di bo bai gasta placa di Aruba den exterior y pa bay papia bobedad. O manera nan ta bisa na hulandes, “Schoenmaker blijft bij je leest” bo no ta un experto scientifico !
