Diabierna ultimo, durante e reunion di Presupuesto Supletorio 2019 den Parlamento, Fraccion di AVP a lansa preguntanan skerpi y alcaso riba e patronchi di gasto di Gabinete Wever-Croes. Parlamentario Michael Lampe durante su disertacion a trece dilanti cu na momento cu ex Minister Oduber a bandona su funcion, el a gasta un suma di ¼ miyon florin na promocion di Serlimar mientras Prome Minister, cu ta esun cu a tuma cargo di e carteranan temporalmente, a bin Parlamento pa pidi un suma adicional di 800 mil florin pa cubri gastonan urgente di salario di empleadonan di Serlimar.

Hecho ta cu ex Minister Otmar Oduber tabata haci y deshaci den Serlimar y e director general y director financiero deliberadamente a laga e Minister actua como tal. Nan mester ta consciente cu tur, incluyendo e Hunta di Supervision di Serlimar ta personalmente responsabel pa e maneho financiero di e compania. Cu a permiti pa tuma tanto trahado adicional, huur edificio innecesario, trucknan nobo via un structura financiero caro, dunamento di trabou na famia y amigonan sin pasa destaho, ta un forma casi delibera pa manda un compania bancarota.

E parti pret den esaki ta cu ex Minister Otmar Oduber a gasta 250 mil florin na propaganda, pero cu mas bien a bay na medionan selecta, sin un vision y plan di mercadeo mes. Consecuencia? Director di Serlimar a menciona cu entre 20 pa 25% so di clientenan a paga pa nan servicio. Pues e promocion NO a funciona!

Parlamentario Michael Lampe a finalisa bisando cu Minister President tin cu duna un bon contesta y laga pueblo sa kico realmente ta pasando cu presupuesto di Pais Aruba y con e mes, como cabes di Gobierno, a permiti tur e fiesta aki tuma luga y cu awor e compania no por cumpli ni cu salario di trahadonan.