fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Minister Oduber mester ta respetuoso cu sr. Jacco Vroegop

Parlamentario drs. Mervin Wyatt-Ras durante conferencia di prensa di partido AVP a expresa di ta sumamente desapunta di e forma con minister a reacciona riba e director di Hospital, sr. Jacco Vroegop. Sr. Vroegop a wordo entrevista na momento cu e minister Oduber no tabata disponibel. E tabata spoorloos. Prensa tabata kier sa dicon di e 17 caso di Omicron tur tabata hendenan vacuna. 

E director di Hospital a ser entrevista dor di amigoe di Aruba. Den un articulo di dia 30 di december 2021 el a trece padilanti lo siguente:  “alle 17 personen die als eerste positief testten op de omicron variant op Aruba waren gevaccineerd”. “Covid Vaccin houdt bescherming of verspreiding niet tegen”. Aki corectamente e ta usa datonan cu tin. Kiermeen vacuna no ta preveni contagio. E tin rason. Den e caso aki. 

E director di Hospital ta continua: “Por a bisa awor ta reconoce ampliamente cu diferente vacuna di COVID 19 ta proteha nos menos contra e infeccionnan di loke tabata pensa anteriormente”. Aki a atrobe e conclusion ta corecto basa riba e datonan cu tin. 

No ta algo stranjo cu tin diferencia di opinion na momento cu ta resulta cu 17 caso di e variante Omicron cu a inicia na Aruba tabata serca personanan ya caba vacuna. Ta momento cu dokternan, scientificonan mester refleha y haya clarificacion pa por sigui desaroya metodonan con pa anda cu e virus COVID-19. E discucion aki ta positivo. Aruba tambe mester “bezin”. Wak kico pa haci y ki procedura pa sigui. Enbes di bai sinta na mesa cu e director di Hospital y skucha kico e tin di bisa y wak con por sigui traha hunto cu n’e, e minister ta skohe pa bai den prensa y bisa cu e director mester trek su palabranan in. Sino fono?. Kico esey ta? Un menasa? Atrobe ta bai bula cabez di un director of presidente di Raad van Bestuur, den e caso aki di Hospital, manera cu a haci den ELMAR, UTILITIES Y WEB NV? Pa nombra friends and family? 

Hospital no ta cai bao gobierno. Hospital ta un entidad cu ta independiente. Tin un Raad van Bestuur y un Raad van Toezicht. Ta nan a nombra e director. E director aki a para fuerte na momento cu nos a haya nos confronta cu COVID. Director Vroegop hunto cu su team di profesionalnan medico, specialista, enfermeronan y demas personal a atende tur patient. A aumenta capacidad di ICU y a trata tur patient y a manda patient pa tratamento den exterior. Tur e trabounan aki e ta haciendo y awor e ta haya e reaccion aki.  E forma con minister ta trata director di Hospital ta sin respet, locual no ta corecto. 

Segun Wyatt-Ras minister mester refleha/pensa bon kico e ta haci y sinta na mesa cu director di Hospital. Por a tuma nota cu e Director no ta pro vacuna. Aki mester tin respet mutuo paso e Director apesar di su opinion, el a sabi di a duna bon sosten na tur loke ta cuido di patientnan. 

Wyatt-Ras a tuma nota tambe di un carta cu Outbreak Management Team di Hospital a manda pa minister pa distancia nan mes di loke e director a expresa den prensa. Ta e momento husto pa enbes di polarisa pa bai traha hunto. Tin cu duna atencion na loke ta pasando pa nos por domina e di cinco ola di e pandemia aki. 

Ta keda cu vacuna ta esencial pa por haci e simptomanan y consecuencianan di COVID menos pa ciudadanonan,  especialmente pa personanan cu tin condicionnan specifico y cu ta vulnerable, manera esnan cu tin malesanan chronico, diabetis y nos grandinan. Banda di esey ta necesario pa tuma tur medida di higiena, manera laba man y uso di hand sanitizer banda di bisti tapa boca y tene distancia social. 

E minister mester laga crisisteam traha. Ta un grupo di profesional. Na otro pais ta e mediconan, specialistanan, epidemiologonan ta esnan cu ta dirigi crisisteam.Aki ta e ministernan ta bin mas padilanti locual ta haci cu hopi hende no ta sigui locual ser recomenda,pasobra no ta sinti e confiansa ni e transparencia. Wyatt-ras un biaha mas ta urgi pa ta pro-activo, duna informacion na nos pueblo. Paso hopi hende na e momento aki ta cuestionado. Hopi hende ta insigur. Mester duna informacion corecto y contesta preguntanan. Ta necesario alabes pa evita rijnan largo ora di test dor di localidadnan mas chikito y serca di pueblo. Pa vacuna por haci mescos, esta haci uso di localidadnan chikito. E hecho cu minister tabata kier shake hands di esnan cu ta vacuna a intimida hopi hende cu na un dado momento no a haci esaki mas. Tin cu baha e drempel pa nos hendenan. Na varios ocasion Wyatt-Ras a menciona e bus di salud y a compronde cu awor si el a wordo drecha pa ser usa. 

Leave a Reply

Your email address will not be published. Required fields are marked *