Minister di Salubridad Publico, Dangui Oduber den declaracion duna na medionan di comunicacion, ta confirma cu cueste loke cueste, gabinete Wever Croes lo introduci uso di cannabis bou di e capa medicinal, segun Melvin Tromp di partido AVP a mustra.
“E forma como minister Dangui Oduber a bay prensa y sigura cu dentro di seis luna e ley cu ta oficialisa venta di cannabis medicinal lo keda cla, ta mustra cu e tres fraccionnan cu ta sostene su gobierno, no tin nada di bisa y ta sigui wordo usa como marionetenan cu solamente tin cu haci loke nan gobierno ta dicidi pa nan.
Ta minister Dangui ta bisando caba kico su gobierno ta bay haci y con esaki tin cu tuma luga caminda e tres fraccionnan den parlamento cu ta sostene gobierno, solamente mester sostene e decisión aki y lamentablemente pueblo lo ripara cu e miembro di parlamento di fracción di MEP, cu durante tratamento di presupuesto 2019 a lanta grita cu ‘e flie aki no ta subi’ cu su persona, ta bay mira e flie bay halto y pa colmo e mes tin cu tene e cabuya pa esaki bula.
E tema di legalisacion di cannabis a lanta hopi discusion y preocupacion den pueblo ya cu principalmente esunnan cu a biba momentonan dificil ora cu nan sernan keri a cay den adiccion despues di a usa marihuana, sa ki daño e cannabis aki por trece pa tur envolvi.
Nos ta convenci cu minister Dangui Oduber mester bin duna cuenta riba e tema aki ya cu si nos ripara cu tin dos tema crusando den otro, esun medicinal y esun recreacional di esunnan cu ta usa e marihuana aki.
E iniciativa di e ley cu minister Oduber ta papiandio di dje pa hopi hende ta mustra di lo bira un ley cu mester hopi mas claridad ariba y caminda pueblo ainda ta den incertidumbre con henter e proceso aki lo bay ta hinca den otro.
Un punto cardinal cu mester wordo aclaria pa e plan di e minister y su gobierno, ta kende of cual grupo local of di exterior lo bay haya permiso pa lanta un plantacion di mata di cannabis pa yega na e materia prima pa por yega na traha e cannabis medicinal.
Cua ta esunnan envolvi den e proyecto aki y con ta bay regla henter e proceso aki pa e no bay for di man caminda tin un grupo of compania cu lo haya permiso legal pa plaata e mata di cannabis pero cualkier otro persona of instancia no ta ser permiti pa nan tambe planta e mata aki.
Pues pa un grupo e lo ta regla pa ley pero pa otronan no, ya cu cualkier persona of grupo por bin dilanti y bisa cu nan plantacion ta dirigi solamente pa uso medicinal.
E situacion aki ya caba ta bin hopi dilanti ora cu autoridadnan descubri plantacion di marihuana caminda un di e prome splicacionnan cu sospechosonan ta duna, ta cu esaki ta pa uso medicinal y por spera cu e grupo aki lo crece asina cu e ley aki drenta na vigor bou gabinete Wever Croes.
Ya caba si ananlisa e declaracion di minister Dangui Oduber ta como si fuera su persona ya caba a bin ta fungiendo como vocero di e grupo cu ta interes den e proyecto aki na Aruba of su persona ta bon na altura con e ta hincando e proceso aki den otro pa yega na e ley indica pa asina favorece un grupo.
Ta na su luga pa minister Dangui Oduber splica kende of kendenan ta e grupo cu cu lo haya permiso pa bin cu e plantacion di marihuana cu mester tuma luga na Aruba y si e por menciona kendenan ta esunnan local cu ta tras di henter e negoshi aki.
Esaki pa motibo cu mester ta bon cla cu segun e hendenan aki ta papia por mira e dollar sign den nan wowo, sigur ora cu realisa cu tin tur indicacion cu tin un grupo yega na un sostenedo di e actual gobierno, esunnan cu ta su tras a papia semper di cannabis recreacional y no esun medicinal.
Tin bruhamento un caminda sigur ora cu expertonan cu a studia e tema aki, ta papia di locual ta ser menciona cu lo wordob produci pa yuda cura cierto malesanan, cu esaki no ta un pensamento corecto.
Loke tur hende kier sa awor riba loke minister a declara ta si e negoshi aki lo ta un fixed business pa famia of compinchinan, hendenan cu ta tras di e proyecto aki pa asina nan por bay explora un negoshi di marihuana legal na Aruba bou di capa di uso medicinal,” Melvin Tromp di AVP a declara.
