Fraccion di MEP no tin nada pero absolutamente nada di bisa Minister Otmar Oduber y apesar cu e fraccion a dirigi un carta na e mandatario pa reuni cu su persona riba su decision pa introduci e medida di cobra pa recogmento di sushi, minister a manda fraccion di MEP bay sinta keto y a pone nan den un huki manera muchanan di un kleuterklas.
Parlamentario di fraccion di AVP, Benny Sevinger a señala esaki mustrando cu ta mas cu bisti cu interes di e fraccion di MEP den e asunto aki no tin valides ya cu sinta banda di Prome Minister Wever Croes, minister Oduber a adverti fraccion geel cu tur e cosnan aki ta parti di e acuerdo di gobernacion firma entre e tres partidonan cu ta sootene e gobierno aki.
“Loke minister Oduber ta haciendo no ta algo nobo of straño pa nos cu a traha caba cu su persona, y nos a yega di adverti parlamentarionan di MEP con e minister aki ta funciona.
Ta un minister cu ta goberna y den su programa di gobernacion, semper den tur su diensternnan, ta purba di pone un suma di placa un banda pa e por dicidi na momento cu e kier, kico e ta haci cu e placa aki y den caso di Serlimar no ta otro tampoco.
E minister aki a bin den parlamento, e minister a pidi parlamento placa extra, pasobra e tabatin 16 miyon caba pa Serlimar, el a pidi 5 miyon extra bisando cu e presupuesto di Serlimar en totalidad ta 22 miyon y a bisa cu e tin un short di 5 miyon, sin tene cuenta cu Serlimar tin un otro parti cu ta e parti comercial di servicionan cu e ta duna na comunidad, cu tambe ta trece placa.
Kiermen eynan caba e minister a gaña parlamento, pasobra Serlimar tin otro entradanan cu e no a bisa parlamento cu ta drenta, simplemente a pidi e 5 miyon extra aki y cual suma parlamento a aproba y dun’e tambe.
Esey ta nifica cu pa e aña aki, Serlimar supuestamente no mester tin ningun perdida, al contrario nan supuestamente mester tin ganashi, pasobra Serlimar a haya su presupuesto totalmente cubri dor di placa di gobierno y entradanan extra cu ta drenta dor di duna servicio na comunidad y na sector priva y na comercio, ta ganashi cu Serlimar lo haya pa inverti.
Sinembargo esey no ta suficiente pa e minister, cu e pochi ey e no por tuma hende den servicio of duna hende contract of regla cosnan cu nos a custuma cu e ta regla pa campañadonan of sponsornan y asina e minister a inventa cu mester cobra pa recogemento di sushi.
Den contestanan di e minister Oduber na parlamento, e ta bisa cu na e momentonan aki tin 10 pa 15 porciento di nos comunidad ta pagando pa recogemento di sushi, e suma di 27,50 pa e ultimo cuater añanan, y di e entrada ey tampoco e minister a informa parlamento kico e entrada ey ta nifica pa Serlimar.
Atrobe minister Oduber a bisa Parlamento cu e presupuesto di Serlimar ta 22 miyon, parlamento ta dun’e 22 miyon pa cubri esaki completo, Serlimar ta haya 15% di personanan cu ta paga pa recoge nan sushi, Serlimar ta haya entre 50% di 700 compania cu ta haci uzo servicion di recogemento di sushi, loke ta otro entrada extra, sinembargo riba esey e minister ta bin for di nowhere y hisa cobransa pa recoge sushi y ta pone esaki den ley di belasting tambe pa comunidad paga.
No tin estudio cu por mustra cu esaki ta e forma cu mester haci’e, no tin estudio cu ta bisa con belasting ta bay cobra esaki, no ta wordo bisa cu e persona cu tin un salario minimo ta wordo exenora, of si tur esunnan cu ta biba na un adres hunto nan salario minimo ta wordo conta hunto pa asina nan tambe paga e 90 florin y no tin claridad riba esaki.
Tampoco tin claridad riba esunnan cu ta pagando Ecotec pa e servicio aki, simplemente e minister manera ta su estilo, ta pusha padilanti, wak cuanto placa e por haya, pa mayan e por uza e placa aki.
Ora cu fraccion di MEP a cuestiona su decision pa cobra pa recogemento di sushi, e minister a bira bisa e fraccion aki, sinta banda di prome minister, cu tende aki ‘boso no tin nada di reclama, boso no tin nada di bisa, boso mester a sali afo defende mi y no cuestiona mi ya cu boso ta sinta eyna, danki na mi persona.’
Pues manera un grupo di mucha den kleuterklas cu juffrouw ta manda ‘in de hoek,” Parlamentario Benny Sevinger ta mustra.
