Parlamentario Benny Sevinger a expresa den conferencia di prensa di partido AVP su preocupacion pa e maneho cu ta wordo hiba pa loke ta Infrastructura y Medio Ambiente.
Sevinger na inicio a papia riba e Infrastructura y e cantidad di yobida cu Aruba a bin ta ricibiendo. El a cuminsa pa splica cu clima ta cambiando rond mundo y no ta na Aruba so. “P’esey tin discusionnan rond mundo riba cuanto grado por “affort” prome cu e desasternan cu ta mira awo sigui. Como isla ultimo añanan nos a inverti hopi den infrastructura cu proyectonan grandi y chikito, unda a haci centenares di proyecto cu no solamente tabata pa mira e problema cu tabatin y atende cu e problemanan existente, pero tambe pa tin un miho calidad di bida pa nos ciudadanonan,” Sevinger a splica.
Gabinete Mike Eman I y II, despues di a haci diferente estudio dor di entre otro FESCA riba e Infrastructura di Aruba y producto Aruba, a haci diferente proyecto cu a wordo desaroya den transcurso di añanan. El a menciona por ehempel careteranan nobo y rotondenan cu a trece un miho fluho di trafico. Pero tambe a trece plateau den barionan pa mas siguridad.
Tur esaki basa riba un estudio, vision y metanan cu a pone pa e pueblo. Un di e retonan cu a keda constata ta cu Aruba ta traha infrastructura pa auto y no ta pensa riba e hende. A papia cu expertonan di entre otro New York cu a conseha pa atende cu siguridad den trafico na diferente forma. Entre otro pa haci e camindanan smal, esnan den bario cambia nan di dos pa un direccion y esaki a wordo haci den diferente bario di Aruba, incluyendo “sleeping plateau”, a crea espacionan berde. “Tur esaki a wordo haci den e ultimo 8 añanan.”
Den cuadro di esaki el a bin ta siguiendo declaracion di e Minister di Infrastructura di Gabinete Wever Croes, kende ta papia cu den loke ta tumando luga awo cu molester di yobida, mester pone un hende responsabel.
Sevinger no ta compronde e expresion aki ya cu ta e Minister ta esun responsabel. A menos cu e ta buscando un forma pa pone un otro director un banda.
Un yoramento un aña despues cu bo ta Minister. No tin un proyecto cu e por mustra cu el a haci.”
Sevinger a recorda cu den Gabinete Mike Eman I y II a laga 4 di e proyectonan di mas grandi cu e pais aki a conoce: mudamento di waf di carga pa Barcadera; renobacion y expansion di Hospital; 4-baansweg pa San Nicolas y Watty Vos Blvd. El a cuestiona di biaha con Minister Oduber hasta a papia di declara e proyecto di Green Corridor failliet, siendo cu e momento ey ta solamente un porciento di e proyecto tabata falta pa finalisa, “cual ni esey e no por handle”.
El a recorda e mandatario cu Infrastructura no ta manera Turismo cu ta biaha y haci show y saca potret. Cu infrastructura mester sinta na mesa resolve e problema y e mester tin un capacidad. “Despues di un aña mester conclui cu e Minister aki no tin e capacidad pa resolve problemanan y ora bo no por, ta facil pa tira culpa riba otro hendenan.”
El a duna e ehempel cu den e proyecto di Watty Vos cu tabatin apenas 20% cla y e tabatin 80% di e proyecto pa ehecuta. Pero por a constata cu constantemente e kier boicotea e proyecto aki y hasta den Parlamento e ta bisa e ta contra.
“Esaki mientras cu den Conseho di Minister di e Gobierno anterior e tabata na fabor, a pasa leynan, a haci tur e destahonan pa cuminsa cu e proyecto y e tabata e Minister di Turismo biahando bisando cu Aruba ta e unico isla cu ta inverti den Infrastructura pa esaki y awendia e ta contra pasobra e no tabata e Minister cu a trece e proyecto. E criticanan cu e ta haci ta infunda. Watty Vos Blvd ta canando su caminda y ta un proyecto cu tin su retonan, pero na final Aruba tin un di e proyectonan cu Aruba conoce, cu lo trece solucion y proyecta solucion pa futuro pa loke ta Infrastructura,” Sevinger a bisa.
Aruba ta bay tin un di e Infrastructuranan di mas moderno, cu ta mira na paisnan grandi y asina mes ta mira un Minister para ta trata di boicotea e proyecto. “Su incapacidad ta loke ta causa daño na e proyecto. No tin nada otro cu proyectonan di Infrastructura tin problema. Hasta ora di traha cas ta confronta reto / problema, pero bo tin cu sinta na mesa y solucion’e. Para un banda grita cu e team / contratista no ta haciendo su trabou bon, no ta soluciona e problema. Pa ocho aña Gobierno anterior a busca diferente solucion pa problemanan ora di construccion.”
Proximamente fraccion di AVP lo bishita e proyecto, cu mester ta cla pa augustus, 2019. E ta un proyecto ta uno asina grandi cu e lo hisa e calidad di bida di e ciudadanonan y crea un miho di e producto Aruba. “Minister no yora, lora man di camisa y traha. Si bo no por hacie, laga otro haci e trabou. Mi por handle nan gratis pabo y e proyecto lo caba na tempo, den presupuesto y resolviendo problemanan sinta na mesa,” Benny Sevinger a declara.
