Mirando tur loke cu ta pasando, Parlamentario Arthur Dowers a bisa cu e ta hay’e obliga pa duna su comentario riba e maneho di e Minister di Inhusticia. Cu tur loke ta pasando a keda demostra hopi cla cu e Minister Andin Bikker a keda desenmascara. E no por a cumpli cu e promesa cu el a haci 8 aña pasa.

E Minister despues di tanto papiamento, ainda no por a presenta un plan cu ta para crimen, ya cu el a bisa cu e ta bay para tur atraco, un delito cu por tuma luga, pero esey no ta loke ta na discusion, segun Dowers. E hecho ta cu Andin Bikker a priminti cu e tin un plan cu ta para tur atraco na Aruba.

Hasta Bikker tabata bisa constantementecu ora atraco tuma luga, e Minister di Husticia mester a tuma su retiro.

“Aworaki mi ta kere cu sr. Bikker mester a tuma su retiro mas cu mil bes caba pasobra ta masha hopi crimen a tuma luga, incluyendo atraco  pero cu ningun crimen cu a tuma luga, sr. Bikker no a tuma su retiro. Tur siman e ta bisa cu tin fout a tuma luga, pero nos ta convenci cu e fout di mas grandi cu a tuma luga, tabata di nombra Bikker como Minister di Husticia. Awe nos ta kere cu Minister Presidente ta realisa cu tabata eror di duna e partido chikito e cartera di Ministerio di Husticia.”

Segun Dowers pueblo por ripara cu Minister di Husticia Andin Bikker, of minister di atraco, no ta atende cosnan serio manera ta su obligacion di haci pero ta bin conta storianan sin sentido, purbando di busca otronan pa culpa, pa su incapacidad total cu e tin den su maneho.

Segun Dowers criminalidad no ta asunto di hunga wega cune, pero pa  algun aña den oposicion, Bikker a mal uza e situacionnan delicado aki pa saca probecho politico cu cual awor e no por cumpli of miho bisa, e no tin capacidad pa atende cu esakinan.

Na luga di bin dilanti y splica pueblo kico e ta bay haci pa combati criminalidad, ta bin papia entre otro di documentonan cu lo a wordo destrui, sabiendo bon cla cu ora c’un carta wordo regista, cu el a drenta of cualkier otro documento, tin varios departamento cu ta haya copia di esakinan.

Pues na tur momento minister Bikker por bay y busca cualkier documento cu e ta kere of pensa cu lo a wordo destrui pero pa tapa su incapacidad, minister payaso aki ta trata di sconde tras di storianan cu e ta inventa sin cu a por inventa un plan pa proteha pueblo y proteha comerciantenan, Parlamentario Dowers a splica.