Un reunion cu fraccion di AVP tin casi un aña ta pidiendo pa trata desaroyonan den enseñansa na Aruba, porfin a tuma luga diamars mainta pero na mes momento e ta confirma e poder cu Minister Lampe ta asina grandi, caminda e por haci y deshaci manera cu e ta haya ta bon.
“Ta mas cu bisto, cu apesar cu Parlamento aña pasa pa medio di un mocion a ordena e Minister aki pa e no introduci cambionan den enseñansa, e ta sigui haci su cosnan, sigui impone su vision y no ta kibra su cabes ni cu parlamento y tampoco cu maestronan preocupa cu tur e desaroyonan cu ta tumando luga.
Ta algo tristo pa mira con maestronan durante di nan demostracion algun siman atras, a pidi Minister Presidente pa interveni den e situacion aki pero tur loke Evelyn Wever Croes a bisa e maestronan, ta bay sinta papia cu Minister Lampe.
Den pasado e mesun Prome Minister aki a interveni y a draai bek varios di e decisionnan cu Minister Rudy Lampe kier a tuma pero awor simplemente tin cu compronde cu e gobierno di Prome Minister cu su 9 asiantonan den Parlamento, na merced di Minister Lampe kende su partido tin un solo asiento.
Ta manera e ex lider di MEP, Nel Oduber a yega di bisa cu 11 kita uno, ta cero y esey pueblo ta mirando den henter e crisis cu tin den enseñansa na e momentonan aki.
Ta mas cu claro cu gabinete Wever Croes ta colgando na un hilo cu 11 asiento na e momentonan aki di sosten y practicamente Prome Minister no por interveni manera antes ya cu e asunto di partido RED, partido di Minister Lampe, ta e yabi na e momentonan aki pa nan sigui den gobierno.
Minister Presidente a pidi yudansa di Hulanda pa 1.3 biyon di florin, pa entre otro yuda esunnan cu a perde trabou, yuda negoshinan cu a haya nan mes den problema cu e pandemia di corona virus, ya cu segun e propio vision di gabinete Wever Croes, ta cu e hende mester ta central.
Ya ta conoci pa algun siman caba cu un grupo di 100 werkster na scolnan rond Aruba, 100 mama di famia, lo bay perde nan trabou segun e vision di Minister Rudy Lampe, caminda ta casi sigur cu lo bay duna probablemente un solo compania pa haci e trabou di limpiesa aki, ya cu mester haci scolnan limpi.
Minister Presidente no a ni hik riba e situacion aki, minister di labor tampoco a reacciona mustrando un biaha mas cu poder di Minister Lampe y su partido na e momentonan aki, ya cu si pone e colega di coalicion aki rabia, gobierno por cay.
Nos fraccion di AVP a yega di bisa esaki na varios ocasion, esta cu e hende nunca ta central pa gabinete Wever Croes, esaki ta bisto den e acuerdonan cu a presenta na Hulanda pa reduci gasto di persona, den e serie di medidanan impone contra pueblo apesar di a sigura cu nan lo goberna sin medida y awor un grupo di 100 hende lo por bay cas den proximo luna,” Parlamentario Benny Sevinger a declara.
