Realmente impactante tabata e intervencion di Minister di Husticia, sr Andin Bikker, durante tratamento di presupuesto supletorio 2019 recientemente pa loke ta criminalidad aki na Aruba.

Parlamentario pa fraccion di AVP, sr Arthur Dowera  a mustra cu na momento cu comunidad a bin ta bibando den ultimo aña den un ambiente di angustia y miedo, Minister Bikker ta bay busca te na 2008 pa mustra cu e ‘indice’ di atraco compara cu 2018, a baha di 65 pa 34.

“Minister di Husticia realmente no a atende e situacion actual cu comunidad ta bibando, esta cu nan no por sali for di nan cas pa un rato, cu nan no por cana riba caya trankilamente, cu nan no por staciona nan auto unda cu ta, ya cu den un frega di wowo, antisocialnan ta comete destruccion y ladronicia na propiedad di e nos hendenan.

Den su disertacion, Minister Andin Bikker a crea e impresion cu simplemente e no ta consciente di loke ta pasando den barionan rond Aruba, cu e no ta bibando ni gobernando aki na Aruba.

Riba dje tin cu bisa si Minister aki ta sikiera lesa medionan di comunicacion tur dia, e lo ta al tanto di loke ta pasando den practicamente tur bario rond nos isla.

Si nos analisa solamente loke a sali den medionan di comunicacion a base di rapport di polis tur dia, tin cu bisa cu den tur bario pueblo ta victima di antisocialnan, for di Mabon pa Cunucu Abou, di Savaneta pa Bubali, di San Fuego pa Oranjestad, di San Nicolas pa Rooi Congo, di Madiki pa Mangel Halto na Pos Chikito, di Parkietenbos pa Piedra Plat y pa Papilon y Malmok, tur ta casonan di ladronicia cu kiebro cu nos hendenan a bira victima di dje.

Esey no ta tur ya cu tin cantidad di caso mas den practicamente tur bario rond Aruba y nos tin cu bisa cu esaki ta loke gabinete Wever Croes a crea cu su maneho den ultimo dos añanan, creando insiguridad, creando instabilidad ya cu Minister di Husticia mescos cu su gobierno, no a cumpli cu loke a priminti pueblo cu nan lo haci.

Ta Minister Bikker a priminti di lo elimina criminalidad den su prome lunanan den gobierno, a priminti cu e lo instala camaranan den tur bario, na tur cas, cu lo bin c’un helikopter cu tin tur cos, cu por mira tur cos for di halto pero e aparato aki nunca a yega Aruba.

A dicidi di trece un aparato pa bula rond y cu esaki tin cu bisa cu literalmente Minister tin un helikopter pa bula rond y nada mas ya cu e no tin aporta alguno den e lucha contra criminalidad.

Ora cu analisa e publicacionnan riba casonan di ladronicia y kiebro den propiedadnan di pueblo, ta mira cu e situacion aki ta for di control y cu Minister practicamente no tin un participacion den henter e proceso pa reduci e cantidad di casonan aki manera cu el a priminti pueblo cu e lo haci.

Loke ta mas impresionante ainda ta cu e culpa Minister Bikker ta tira riba presupuesto cu tin cu cumpli cu cierto aspectonan di esaki pero e ta forma parti di un gobierno cu a priminti pueblo cu nan lo tin solucion pa e situacion financiero, cu tur cos lo bira miho ora cu nan drenta gobierno.

A priminti asina hopi y awor ta bin sconde tras di e maneho financiero di su propio gobierno, cu ta sigui aumenta gasto di gobierno,  sigui aumenta gasto di personal cu miyones pero pa inverti den husticia pa por tin mas trankilidad den comunidad, no tin placa awo.

Aruba ta pasando den momentonan dificil riba tur tereno, riba tur nivel pero na mes momento pueblo tin un gobierno caminda e mandatarionan ta duna e impresion cu nan no sa kico ta

pasando den pueblo y esey a wordo refleha un biaha mas durante di e reunion ultimo,” Parlamentario Arthur Dowers  a declara.