E reunion publico di Parlamento pa atende presupuesto 2018 di Gobierno di Aruba a inicia diahuebs cu 3 Minister presente. Parlamentario di Fraccion AVP, Robert Candelaria, a haci diferente pregunta specifico na Minister di Husticia, mr. Andin Bikker.

 

P’e Parlamentario e momento aki tabata uno importante pasobra no solamente a trata e presupuesto di Aruba, pero tambe e manera con Parlamento ta trata e presupuesto. Tabatin un publico grandi den tribuna, cu ta algo bon, pero di otro banda tabatin hopi strobamento. Ta importante pa Parlamentarionan trata presupuesto cu respet y trat’e completo.

Mester tene cuenta cu loke nan a palabra aworaki ta importante pa henter e aña, asina Parlamentario Candelaria a señala. Husticia mescos cu departamentonan di social of asuntonan social ta problemanan cu den ultimo tempo ta centro di atencion den comunidad. Esaki ta pone cu Parlamento no por trata esaki lihe, no por trat’e riba-riba pero mester ta critico den dje.

 

Na final di dia ora cu presupuesto pasa Parlamento, no por yam’e bek y cambia esaki. “Aworaki ta e momento pa deal cun’e”, el a indica. Parlamentario Candelaria a haci diferente pregunta critico, cual ta preguntanan cu el a spera di ricibi contesta. E ta lamenta cu casi niun di su preguntanan cu el a manda por escrito no a bin bek cu contesta. Esaki a pone cu el a ripiti algun di nan y ta en espera cu Minister por duna contesta pa asina nan por reacciona bek.

 

E reunion ta bayendo den bon direccion y cu tur Parlamentario lo sigui mira esaki den un manera critico, haci preguntanan critico constructivo. Na final di dia Parlamentarionan no ta haci esaki pa nan mes, pero p’e comunidad di Aruba.