Ta casi dos luna cu carnaval ta tras di lomba pero ora cu scucha e forma con Minister di Finansa actual kier trata na hustifica aumento di personal cu mas cu 100 hende nobo, e ta mustra cu e mandatario ainda ta den ambiente di ‘disfraz.’

Lider di fraccion di AVP den Parlamento, Marlon Sneek ta mustra cu no ta fraccion berde a trece esaki dilanti, pero tanto Raad van Advies como CAFT a mustra den nan conseho prome cu a trata presupuesto 2018, cu tin aumento di gasto di personal hunto cu otro gastonan adicional di gobierno.

“Un gobierno cu a priminti pueblo sinceridad, a priminti transparencia y mas cu tur cos, a priminti integridad, no por permiti  guia su mes a base di mentiranan politico cu lo no beneficia e mesun pueblo cu nan a huramenta pa sirbi.

Minister di Finansa kier bin hustifica e hecho cu su gobierno den apenas algun luna ya a pone mas di 100 persona extra na trabou den e aparato gubernamental, bisando cu e grupo aki ta consisti di personal pa polis, maestronan y otro departamentonan uniforma.

Aki claramente por tuma nota cu e minister kier disfrasa e mal hecho di su gobierno, cu observacionnan cu no ta basa riba berdad ya cu si tin un grupo di polis nobo cu a drenta servicio, esaki nan salario ta den presupuesto di 2017 caba ya cu asina c’un persona bira aspirant polis, e ta cuminsa c’un salario.

Den casonan di maestronan di scol ta un hecho cu ningun estudio of curso pa bira maestro, ta finalisa na december of luna di januari sino te na luna di augustus, pues ta imposibel pa minister trata na uza e grupo aki como gasto di personal cu a aumenta.

Mesun gobierno aki cu a uza nan miembronan di Parlamento pa bin grita na bos duro riba gastonan pa ‘deskundig advies’ cu esakinan tabata hopi halto bou gobierno di AVP, awor ta bin resulta cu den presupuesto 2018 di gabinete Wever Croes, e gastonan aki di ‘deskundig advies’, a aumenta mas cu e presupuesto di 2017.

Igualmente pa loke ta gasto di gobierno pa publicidad cu tanto a ser cuestiona pa miembronan di fraccion den parlamento cu ta sostene gobierno, riba  presupuesto 2018 por mira cu e gasto aki a aumenta, pues a bira mucho mas cu loke a wordo gasta anteriormente.

Ta e tipo di maniobranan aki Minister di Finansa kier convence pueblo cu su maneho ta esun corecto, mientras cu tur su promesa y di su gobierno pa baha gastonan, a bay den prullenbak y gastonan di gobierno a aumenta pa motibo cu ‘friends & family’ tin cu wordo recompensa pa nan sosten na partido durante di eleccion,” Parlamentario Marlon Sneek di AVP a declara.