Diahuebs, den Parlamento, 17 stakeholders cu a firma un “brandbrief” a acudi na un reunion di comision di Salubridad pa trece nan preocupacionnan padilanti encuanto e medidanan den cuido di 5 miyon florin pa luna y na final di anja, despues di 7 luna, 35 miyon. Nan ta pidi un alivio. Nan ta trece den nan carta publico padilanti cu e medidanan cu a ser impone den cuido lo afecta calidad di cuido y e cantidad di pashent cu lo por ser atendi. Dor di e medidanane.o. e personal lo por bandona nan trabou dor di cual e calidad lo disminui y lo meser manda mas pashent den exterior paso no lo tin e profesionalnan specialista suficiente y capacita pa atende pashentnan. Kiermeen esun cu lo ser perhudica ta e pashent. Loke a ser palabra cu Hulanda pa loke ta trata medida ta continua y hasta ta ser hisa pa e sector di cuido. Den e carta ta ser menciona cu durante su bishita na Aruba, minister Raymond Knops a trece padilanti cu no ta necesario pa tuma medidanan solamente den cuido. Pues segun e stakeholders den cuido tin espacio pa traha hunto na reformacionnan structural na lugar di kita cierto tipo di cuido dor di cual no por garantisa calidad. E stakeholders den cuido ta pidi pa sinta na mesa y haya sikiera mita anja pa baha e presion ariba nan, pa nan por duna lo mihor di nan y pa yega na reformanan necesario den cuido. 
Segun Wyatt-Ras e minister ta keda full afo di esaki y ta tira culpa riba AZV. Sinembargo e minister di Salubridad, Dangui Oduber, ta esun responsabel pa e medidanan, hunto cu minister Evelyn Wever Croes, kende a core firma e deal cu Hulanda. E minister di Salubridad alabes, manera ladron den anochi, a core pasa un landsbesluit pa kita cantidad di remedi foi riba lista positivo cu pashentnan por a haya sin cu ningun musca no a bula. E ta esun cu a stop e compania “Light Life” pa transporta pashentnan di dyalise pa pone su propio coordinadornan haci e trabou aki y duna tur su coordinadornan trabou na e seccion di “ouderenezorg” na deparamento di Salubridad Publico. Esaki mientras e la vota contra e ley di “ouderenzorg”. Ademas e minister aki a corta den cuido di djente, dor di cual nos hendenan grandi no por haya nan djentenan falso, manera tabata e caso anteriormente. Por bisa cu e minister aki ta maltrata grandemente esnan humilde den nos comunidad, perhudicando nan. 
Wyatt-Ras ta haya lamentable cu e minister aki y su gobierno ta tuma medida grandemente den cuido na Aruba. Esaki mientras cu na tur otro pais cuido juist ta haya mas atencion y p.e. na Hulanda hasta a duna un bonus di 1000 Euro na esnan den cuido.