Diabierna mainta a tuma lugar un Bijeenkomst na Parlamento encuanto e landsbesluit Beroepen in de Gezondheidszorg (lv BIG). Presente tabata representantenan di Dokternan di cas (HAVA) y specialistanan di hospital (ASHA) cu a representa tur specialista. Ta asina cu desde cu e lb-ham a drenta parlamento dia 14 di augustus ultimo, fraccion di AVP a manda carta pa presidente di parlamento dia 18, 21 y 24 di augustus pa yama reunion pa skucha stakeholders y minister. Lamentable tabata cu e minister encarga cu salubridad, Dangui Oduber, a zeg af na ultimo ora dor cu probablemente e no kier a sinta hunto cu e stakeholders of ela haya “cold feet” of a cobardia.
Sinembargo Parlamento si a reuni cu e stakeholders. Un dia anterior dia 27 di augustus e stakeholders (HAVA, ASHA, VMSA y AVSD) a manda un carta pa Staten y pa Gobernador pa mustra nan desaprobacion pa e posicion cu minister ta tuma pa loke ta trata AruBIG y su decisionnan entorno acreditacion di mediconan, especialmente esnan cu studia den region. E ley di BIG a ser aproba dor di Parlamento na anja 2014 y na 2017 a start cu su implementacion dor di gobernacion di AVP. Awor despues di 3 anja largo di silencio minister Dangui Oduber ta presenta un Lb-ham pa atende cu e ley di anja 2014. Ta resulta cu el a haci net nada cu conseho di e veld medico. Voor spek en bonen nan a dune nan opinion. Ta lamentable cu un minister di salubridad ta trata nos organisacionnan encarga cu mediconan di e forma aki. Tampoco e no a tene cuenta cu conseho di e organo halto di Raad van Advies. A conseh’e pa lanta un institito di Calidad, segun e ley di Calidid di cuido cu a ser aproba na anja 2014.
Pero e entidad aki ta curu y no a traha riba e Lb tampoco pa asina duna base legal na exigencianan di estudio pa cada tereno di experticio. Ademas e sistemanan di acreditacion cu e minister kier introduci di Costa Rica (SINAES) y esun di Colombia (CNAC) no ta registra na e organo internacional di acreditacion, esta World Federation for Medical Education(WFME). Pues lo ta bai tin desigualdad entre e sistemanan di acreditacion cu esun di BIG. Locual lo por demotiva esnan cu ta certifica segun BIG. Ta esencial pues cu tin congruencia entre diferente sistemanan di e paisnan di acreditacion. E Instituto di Calidad lo por traha cu otro paisnan pa garantisa proceduranan, protocolnan semehante y cooperacion cu otro paisnan en especial den Reino. Ta reconoce cu mester bin un solucion pa e studiantenan cu a studia medicina den region, sinbargo esaki mester bai na un forma cu ta cuadra cu standaardnan internacional di acreditacion. En especial den e temponan nos dilanti cu lo bira mas dificil pa manda pashentnan den exterior y cu nan mester sigui tratamento den nos pais mes ta necesario pa garantisa bon calidad di cuido y sigur si nos kier introduci turismo medico ta imperativo pa garantisa standaard halto di cuido. Durante reunion fraccion di AVP a propone pa comunica e descontento di stakeholders na minister.
Despues di e reunion cu stakeholders parlamento a yama un reunion di Comicion Central. Di e forma aki Parlamentarionan lo por manda nan preguntanan, preocupacionnan y objecionnan pa e minister pa evita cu e lb lo ser ehecuta, manera e ta awor. Parlamento ta spera cu e minister ta habri pa opnion di e stakeholders y Parlamento. Den caso e ta terco e por sigui su plan, sinembargo esaki lo afecta calidad di cuido na Aruba den sentido negativo. Dialuna awor lo mester entrega preguntanan pa ser manda pa gobierno.
