E momento a yega pa Minister di Husticia cuminsa traha, cuminsa cumpli su plan pa para criminalidad riba e isla manera cu el a priminti cu por haci y cu e Tabata sa con pa haci esaki, Parlamenterio Arthur Dowers a mustra relaciona cu declaracionnan duna pa minister Bikker.
No solamente e minister no ta cumpliendo cu promesanan haci cu e lo elimina e ola di criminalidad riba e isla, pero e lo percura pa solucionnan duradero pero despues di shete luna den gobernacion, pueblo no por mira algo cu a wordo haci pa Minister Bikker.
“Na prome luga ta bon pa mustra cu na momento un minister di husticia no por ta sincero cu su pueblo, e ta bira un obstaculo grandi pa siguridad di henter comunidad, sigur ora cu e ta insisti pa culpa otro pa su incapacidad y falta di vision.
Sinembargo esey no ta nada nobo cu ministernan di e coalicion aki, ya cu na cantidad di ocasion nan a demostra caba cu nan no ta sincero cu pueblo, entre otro di no cumpli cu tur loke nan a priminti durante di campaña electoral.
Loke minister Bikker tin cu haci ta di duna pueblo tur loke el priminti y ora cu scucha su persona duna declaracion riba e maneho cu e lo kier hiba, e no tin nada concreto pa duna pueblo pero ta sigui insisti cu tur cos tabata malo cu husticia cu e gobierno anterior.
No solamente Bikker ta insisti pa bisa cosnan malo di mi persona y di e maneho cu nos gobierno a hiba, e ta falta respet na otronan tambe cu a traha cu husticia, dunando informacion incorecto y den e proceso aki, bisando practicamente cu Cuerpo Policial no a funciona debidamente.
Un rato e ta papia di no kier mete cu e caso di Corte di un agente policial dilanti hues den un caso di accidente fatal, pero ta confirma cu el a duna orden pa haci un investigacion di kico a bay malo cu e investigacion haci pa cuerpo policial.
Minister Bikker den su afan pa haci politica barata, hasta ta declara na prensa cu ultimo añanan Cuerpo Policial no a traha riba cifranan relaciona cu trabou di e cuerpo y como tal no tin cifra pa duna riba casonan criminal cu a tuma luga, sigurando cu e Hefe di Polis nobo cu el a nombra, a pidi su persona tempo pa traha riba esaki, dunando indicacion asina cu e hefe di polis anterior lo no a cumpli cu su responsabilidad.
E momento a yega pa Bikker cuminsa carga su responsabilidad como minister di husticia, cuminsa traha y stop di hunga ‘mooi weer’ ya cu esaki no ta para su persona y no ta sirbi interes di nos pueblo.
Den su afan pa pone otronan mustra malo, minister Bikker ta confirma cu Ministerio Publico si tin su cifranan na ordo pero Cuerpo Policial no pero ora cu analisa tur cos tin cu bisa cu e cifranan cu Ministerio Publico ta ricibi, pa gran parti ta cifranan cu nan ta ricibi di cuerpo di polis mes cu ta atende cu casonan.
Loke minister Bikker ta haciendo y culpando otro cu no tin cifra disponibel di casonan di polis ta pa sconde su mes e cifranan di cuanto atraco arma, violencia domestico, casonan di maltrato y cantidad di ladronicia, Aruba a conoce desde cu su persona a bira minister di husticia.
Minister Bikker tin cu stop di busca excuus pa su incapacidad den su maneho, su falta di vision y su falta di incumplimento pa un pueblo cu el a priminti hasta camara di siguridad na tur cas,” Arthur Dowers a splica.
