E caso di detencion di varios miembro di prensa siman pasa, a conmove comunidad sigur mirando e forma con autoridadnan a atende cu e caso aki y con a trata e miembronan di prensa aki.
Parlamentario Benny Sievenger a mustra cu tin hopi aspecto di e caso aki cu ta keda un interogatorio pa motibo di e forma con a atende cu e caso aki y e forma con despues minister kier laba man di e persecucion aki.
“Nos por a tuma nota con pueblo a rechasa e forma con husticia a atende cu e caso di portophonenan caminda por a mira cu diferente miembro di prensa a wordo deteni pa wordo interoga riba presuntamente portophone di polis cu lo a wordo horta.
Si drenta den detaye riba e caso aki mi por a tuma nota for di e diferente persona di prensa cu a wordo deteni den e caso aki, cu nan ta wordo sospecha di a horta un portophone cu ta na Warda di Polis.
Ta lanta e pregunta e ora con por acusa un persona di a horta algo caminda cu bo tin esaki den bo poder, ta mescos cu mi por yama polis pa haci denuncia cu nan a horta mi auto pero polisnan ta bira bisa m, pero ata bo auto den garashi staciona! Pero no nan a horte!
E ora ta lanta e pregunta cu si dilanti mesa berde esaki lo tin validez.
Sinembargo e forma con a haci e detencionnan aki, nos como parlamentario y sigur como partido, ta cuestiona y ta condena esaki.
Ta masha facil na momento cu bo ta haya ‘opdracht’ for di minister y den e caso aki mi por a tende minister Bikker sali bisa cu su persona ta inocente, cu nunca el a duna opdracht cu e no sa di nada y pa laga husticia cana su caminda.
Na mes momento nos por mira con Meneer Integridad , sr Rocco Tjong bin dilanti y bisa mesun cos, esta cu ta inaceptabel con AVP kier influencia husticia aki na Aruba.
Sinembargo pa di dos biaha nos por a tuma nota cu minister di husticia ta laba man di asuntonan cu ta su responsabilidad ya cu tur hende por corda den e caso cu minister Bikker a firma e documento pa laga dos pedofiel Sali prome cu nan caba di sinta nan castigo, pa despues nenga cu e no sa di nada.
Pa colmo minister Bikker den e caso aki a yama un conferencia di prensa y practicamente a pone Fiscal sinta hunto cune pa e trata di convence pueblo cu el a firma e documentonan aki pa laga e dos pedofielnan liber pero cu e no tabata al caso di loke e tabata firmando.
Imaginabo un minister cu ta firma un documento y e no tin conocemento di contenido di e documento cu el a firma pues no ta prome bes cu minister di husticia no ta carga responsabilidad pa e maneho cu e ta hiba.
Siman pasa e minister ta manda ministerio publico bin dilanti y sigura cu nan ta traha sin tuma opdracht di ningun hende pero un dia despues ta sali den medionan di comunicacion, un publicacion di dia 16 di mei 2018, relaciona c’un caso di atraco caminda minister Bikker no a keda contento di mira ex minister di husticia Arthur Dowers na e sitio y despues dunando declaracion na prensa tambe.
Loke a cay den mal tera cerca Bikker tabata e hecho cu Dowers tabata na e sitio di e caso serio aki mientras cu su persona no tabata na altura mes di loke tabata sosode den comunidad, y su fuse a bula ora cu el a tuma nota di presencia di Dowers na e sitio di crimen.
Sinembargo e famia victima di e atraco ta hendenan yega na colega Dowers y nan a yama su persona pa bin eynan y esaki no a cay den bon tera cerca e actual minister.
Su frustracion tabata asina grandi cu algun dia despues dia 16 di mei, Bikker a manda yama un conferencia di prensan caminda minister Bikker a declara cu investigacion interno riba perdida di radio di polis a start.
Pues ta Minister Bikker ta come lubida y ora cu cosnan bay den un rumbo robes, caminda ta priva hende di nan libertad sin cu tin prueba concreto y legal pa un acusacion, e minister ta bolbe core bin bisa cu ningun momento el a duna opdracht pero su propio declaracion ta mustra su culpabilidad den e caso aki ” Parlamentario Benny Sievinger a declara.
