Recientemente parlamentario ing. Mike de Meza a participa den un reunion di comision central di transporte cu representante di e centralnan di taxista, como miembro di fraccion di partido di Pueblo Arubano AVP. Esaki tabata un oportunidad pa de Meza amplia y confirma su nocion di e impase actual entre Minister di Transporte Ursell Arends y sector di taxista. 

E ta sinti cu e reunion a bay den un bon esfera y na su salida a comparti su conclusion cu e maneho di Minister Arends no ta conta cu un base huridico firme, ni tampoco cu uno politico. Como tal y manera cu a expresa nan varios ocasion anterior, incluso ora cu parlamento a aproba un mocion relaciona cu e tema bek den luna di december, AVP no ta sostene e accionnan di parti di Gabinete Wever-Croes II contra chauffeurnan di taxi.

“E situacion no a cambia, por ta te hasta el a bira pio. Minister a bisa cu e tin dos decreto ministerial y cu e lo por bin cu un di tres. Aki bo ta mira cu aparentemente minister no a tuma conseho huridico pasobra un decreto ministerial (ministerieëlebeschikking) no ta mas halto cu un ordenanza nacional (landsverordening) den e herarkia di ley. Si bo mira e decreto ministerial su contenido, e no ta cuadra huridicamente,” asina de Meza, kende a yega di ocupa e funcion di minister di transporte, a splica. 

E parlamentario di AVP ta lamenta di mira un minister asina cabes duro, cu den 2024 ainda no tin boluntad pa dialoga. Esey sigur no tabata e caso bou gobernacion di AVP cu for di prome instante y bou liderazgo di Mike Eman, for di 2009 y te 2017 semper a sa di sinta y dialoga cu tur stakeholder, riba tur topico. 

Fuera cu e cambio cu Minister Arends kier trece no ta corecto legalmente y no tin aceptacion, tampoco ta conta cu sosten di e gran mayoria den parlamento y esey ta inclui e propio fraccion di coalicion, esta MEP. “Bo ta puntra bo mes kico ta interes di e minister cu e ta para asina firme riba esaki; te na e punto cu e mes no tin e sosten cu e mester pa pasa un ley. Mi ta kere e minister ta hopi confundi den esaki,” asina e parlamentario a conclui bisando.