Minister di Husticia, Andin Bikker, semper ta cuminsa y caba tur su frasenan cu “su herencia” y constantemente e ta comenta con el a hereda hopi cos di su predecesor, miembro di fraccion di AVP, Robert Candelaria ta mustra.
E parlamentario a sigui mustra cu lo ta un bon momento tambe pa papia riba su herencia y kico e mandatario a haci cu su herencia.
“Aña pasa juni e departamento “Inspectie Justitie en Veiligheid” di e ministerio di husticia y siguridad di Hulanda, a manda un carta pa minister Bikker, relaciona cu trabounan di inspeccion cu nan a haci na KIA. Casi un aña di gobernacion a pasa cu el a ricibi e carta aki y nos a laga un aña mas pasa despues cu a carta a sali pa wak con e minister ta deal cu e herencia aki y entre otro a informa Minister Bikker:
Despues cu e team a bishita Aruba na april 2017 nan a bisa cu nan a mira cambionan visibel den mehoracion di calidad di e acomodacion y ampliacion di e actividadnan pa preso den KIA. Esaki tambe ta algo cu a wordo hereda dor di e minister. Kico el a haci cu e herencia aki?
Otro conclusion di e rapport ta mustra:
Aki ta ser bisa cu e sosten di e gobierno anterior, en particular di e ministerio di husticia anterior na e director di e tempo ey, tabata aspectonan importantem, cu a yuda na mehoracion den KIA e tempo ey. Tambe a sigui mustra cu e minister anterior, esta Arthur Dowers, tabata hopi envolvi na programa di mehoracion den KIA. E rapport a termina mustrando cu a bin eleccion y un cambio di minister y e resto di e storia ta conoci pa tur hende. Esaki ta papiando di herencia. Awor kico abo como Minister di Hustician pa dos aña caba, a haci cu e herencia aki?
Cambionan positivo y renobacion cu por a nota prome, no a continua di e mes forma. Dicon no a sigui traha riba e herencia aki? Entre otro e rapport a señala:
Na 2017 tabatin actividadnan den preparacion cu no a continua. E actividadnan aki cu mester a tuma luga cu boluntarionan no a continua y esakinan tabatin netamente como proposito pa yuda presonan rehabilita. Esaki ta algo simpel cu nos a papia di dje den campaña. Mester traha cu iglesianan y fundacionnan den nos comunidad pa yuda esnan cu a cay den criminalidad y den man di husticia pa nan no cay mes, pero re-integra den nos comunidad. Atrobe nos ta mira un herencia cu Minister Bikker no a sigui cune.
E carta dirigi na ministerdi hsuticia actual, ta djis un ehempel di un herencia di e minister Bikker, cu tabata riba un bon caminda pero awe ta un punto di precupacion hopi grandi den nos comunidad,” Parlamentario Robert Candelaria a mustra.
