AVP a cuminsa tuma e pasonan necesario pa mira con por cambia e percepcion cu tin actualmente bou di e comerciantenan, cu ta un herment importante den economia di un pais. Un delegacion di AVP encabesa pa lider di Partido Mike Eman a bishita Camara di Comercio unda cu e tema central tabata e rapport di Banco Central cu ta indica un caida di percepcion basta grandi den e comercio pa loke ta trata e economia, nan inversion y ventanan.
E conclusion di esaki ta simplemente cu negoshinan ta cerando nan porta, ta invirtiendo menos y nan tin menos entrada. E miedo ta cu esaki lo bay tin como consecuencia aumento di desempleo y un economia cu ta bay ta stagnando pa motibo di e pakete di medida cu Gobierno a bini cun’e. Pero tambe pa un falta di perspectiva positivo pa futuro, Eman a bisa na salida di e reunion. “Si bo mira e cifranan aki ta di e prome dos kwartaalnan, prome cu e pakete di medida a drenta na vigor, ya caba por a sinta e preocupacion e preocupacion den e encuesta cu Banco Central a haci.
Den e encuentro aki a bini dilanti cu Camara di Comercio ya caba a expresa nan preocupacion riba e tema aki den e reunionnan cu nan tabatin cu Gobierno riba e efecto di e pakete di medidanan. Nan a haya siguransa di Gobierno cu a pakete di medida ta algo temporal. “Pa nos si e ta temporal of no ya el a perhudica pais Aruba. Pero AVP tin hopi duda si e ta algo temporal, pasobra a constata cu enbes di baha gasto, a subi esakinan na 2018. Pa nan por yega na e normanan di 0.5% di deficit, manera cu nos a laga e presupuesto di Aruba, lo tin mas medida pa bini.
Ta bay bin cu otro ahustenan y e efectonan riba economia di Aruba lo bira hopi mas grandi.” E politico a agrega cu Camara di Comercio, representando Comercio di Aruba, tin nan preocupacionnan pa cu e desaroyo aki, pero ta keda na nan pa expresa esaki.
“No por papia pa nan pero nos a sinti cu nan a expresa esaki si den reunionnan cera cu Gobierno.”
Hecho si ta cu Camara di Comercio no tin duda den e realidad di e cifranan di Banco Central y e realidad den e analisis. Nan a duna nan opinion y a duna e pakete di medida su beneficio di duda, ya cu nan a wordo bisa cu esaki ta algo temporal. Pero nan ta pendiente pa mira si Gobierno ta bay cumpli cu e pakete ta algo temporal. Pero, Eman a bisa, pueblo no por carga mas medida y tur hende mester tuma un posicion pa salba e pueblo.
E splicacion di Gobierno cu e efectonan di e pakete di medida ta algo temporal, ta algo cu AVP no ta kere aden. Nan ta basa nan mes riba e hecho cu Banco Central su informe mes ta bisa cu nan ta premira cu e efectonan lo perdura den e añanan cu ta bin y lo causa hopi daño na economia di Aruba. “Nos t’aki awe como fraccion y Partido AVP pa duna un perspectiva pa futuro, cu si tin alternativa. Ora asumi responsabilidad di un pais, bo tin cu mustra perspectiva, duna un plan, duna un vision y no por biba ta papia di crisis y ataca Gobiernonan anterior sin cu bo mes tin solucion pa tur e temanan cu tur gobernacion ta enfrenta cun’e. Falta di vision, falta di capacidad y un cantidad di decisionnan robes awe ta afectando direccion di pais Aruba.
Eman a informa cu nan tin programa tambe reunion cu esnan cu ta traha den transporte publico pasobra nan ta mira cu prijs di gasolin ta subiendo dramaticamente (mas cu 10%), mientras cu cuminda a mira aumento di mas cu 10% den e par di lunanan cu e medidanan a drenta na vigor. “Pa fin di aña nos ta papiando di aumentonan hopi grandi den costo di bida y empobrecimento di ciudadanonan. Esaki mientras cu nos a inverti den aumento di salario minimo, a bin cu schoolkinderen toeslag, aumenta pensioen, reparatietoeslag y den un corto tempo e Gobierno aki ta kitando e poder di compra bek for di e ciudadanonan.”
E lider a bisa cu AVP mirando e situacion aki, no por sinta keto. AVP ta representa e pueblo y den e bishita den fin di siman na San Nicolas a haya un mandato hopi cla, cu tur instancia y organisacion cu tin e pueblo na pecho mester para e desaroyo negativo aki.
Tambe Eman a bisa cu ta incomprendibel pa AVP cu Gobierno a bini cu un pakete di medida sin cu tabatin un dialogo cu partnernan social, of con por contra-balancea e situacion pa protege principalmente esnan mas vulnerabel den comunidad. E Gobierno aki a cera buki pa Dialogo Social y den corant nan ta lesa di medidanan cu ta bini. Mas e dudanan ta crece ora cu ta mira cu ta bini cu medida, pero tambe ta aumenta e gastonan di Gobierno cu 100 miyon florin. E ta haci, door cu no a sinta na mesa, e confiansa di comercio y consumidor ta cay.
Pa finalisa, Eman a bisa cu e Gobierno aki no por tira ahustacion of medida riba e Gobernacion anterior. For di momento cu a presenta e presupuesto 2018 cu tin 100 miyon florin mas di gasto cu e ultimo presupuesto di e Gobernacion anterior. Esey ta mustra cu ningun momento a bini cu un aumento di 3% di BBO pa paga un deficit cu bo a haya di e Gobierno anterior, si bo mes a aumenta e deficit cu 100 miyon florin pa paga amigo y famia cu bo a pone den Gobierno.
