Especialmente pa su vision y anjanan di dedicacion na duna un contenido nobo na e relacionnan den Reino y pa cu Union Europeo, ex Promer Minister Mike Eman a worde invita pa duna un lectura na e sociedad prestigioso di Hulanda, Litteraire Societeit de Witte.
Punto di interes lo ta un analyses di e forma con como Promer Minister, Mike Eman a crea un synergia di cooperacion cu Reino pa focus riba un strategia di oportunidadnan cu win-win pa tur dos banda.
Establecimentonan manera TNO, Port Amsterdam, regreso di KLM, projectonan comun cu Schiphol (Portanan automatico di entrada y salida/Happy Flow), cu Phillips (conversion di luznan convencional pa LED), Sheepvaartschool Rotterdam, establacimento di un Centro di Excelencia di UNDP pa SIDS na Aruba (CoE) ta ehempelnan di resultadonan importante cu a confirma e potencial di e vision strategico. E resultadonan aki a prueba cu su vision cu un isla chiquito manera Aruba tin un valor strategico pa Reino y pa Union Europeo. Enfocando riba e ubicacion strategico, condicionan climatologico y escala ideal pa desaroya projectonan inovativo Mike Eman a logra e establecimentonan y desaroyonan aki na Aruba. Den su presentacion na Hulanda y Bruselas lo e invatisa cu ainda tin hopi mas oportunidad na beneficio mutuo di Aruba, Reino y Union Europeo.
Esfuerzonan di Mike Eman ariba tarima internacional a juda grandemente tambe den posiciona Reino y specificamente Hulanda (Dutch solutions for Global Challenges) den mundo como Pais cu experticio pa juda soluciona retonan global, manera e retonan rond di cambio di clima y e tema di energia renobabel.
Iniciativanan conhunto entre Aruba y Reino na nivel di United Nations y otro plataformanan universal a crea hopi respet y admiracion internacional tanto pa Hulanda como pa Aruba. E eleccion di Hulanda como miembro di Conseho di Seguridad ta un di e frutanan di e empenjo conhunto aki pa cual e ex Promer Minister Mike Eman a haya hopi reconocimento pa su contribucion di parti di Promer Minister Rutte, Minister di Relacionan Exterior Bert Koenders y tur e cuerpo diplomatico di Hulanda. Eman a worde delega tambe pa a firma e tratado di Paris di cambio climatologico na Nacionnan Uni den nomber di Reino. E contribucion aki tambe Mike Eman a duna continuamente cu representacion inspirativo den mundo como Hefe di delegacon pa Reino y panelista pa Reino na un cantidad di momentonan internacional di valor grandi pa humanidad riba temanan di Islanan Chiquito (SIDS), Sustainable Development Goals (SDGs), tema di energia renobabel, desaroyo duradero y renobacion urbanico strategico . Temanan cu e a pone central tambe na Aruba.
Mike Eman tabata instrumental tambe den pone Aruba como un participante cu contenido, vision y accion dentro di Union Europeo. Esfuerzonan aki di Mike Eman ta data bek di tempo cu e tabata parlamentario cu e a lucha pa opcionnan huridico keda habri pa Aruba por opta pa un mihor posicion den Union Europeo te cu su anjanan como Promer Minister liderando esfuerzonan pa un mihor posicion pa paisnan y regionan cu status LGO den Union Europeo. Cu awe tin un opcion den Tratado di Union Europeo cu paisnan cu ta LGO y of UPG por tin derecho di cambia status basa riba un provision special den Tratado di Union Europeo ta directamente merito di Mike Eman su trabao.
Realisacion di derecho di voto pa ciudadanonan di Reino caribense hunto cu dr. Mito Croes pa Parlamento Europeo ta otro logro historico. E trajecto huridico constitucional aki sin precedente te den a Corte Europeo (Eman/Sevinger) awe ta forma parti di jurisprudencia di trancedental importancia ora papia di derecho di ciudadanonan di Union Europeo. Literatura y profesornan di derecho den ley di Union Europeo tur ta afirma e efecto significante cu e litigacion strategico aki tin den formacion di e base di derechonan di ciudadanonan di Union Europeo. Esaki ta di hopi importancia pa ciudadanonan di Aruba cu un pasaporte di Union Europeo ariba otro temanan di derecho humano banda di e derecho di voto adkiri cu e esfuerzo grandi aki.
Ta deseo y un compromiso expresa door di ex Promer Minister Mike Eman pa keda activo pa interes comun di Aruba y Reino. Den e cuadra aki tambe su bishita pa e lectura special aki na Den Haag Hulanda y Bruselas lo inclui reunionnan pa pone un agenda nobo y esohencia di plataformanan nobo den cual un tarjectoria manera cu Mike Eman tabata tin por sigui worde utilisa y sigui ta instrumental na interes di humanidad en general, Union Europeo, Reino y naturalmente Aruba.
