Durante e grandioso Congreso AVP 2013 teni diasabra ultimo den Aruba Entertainment Center na Dakota, miles di persona a yega hunto pa tende di e plannan cu partido tin pa sigui den e rumbo di progreso y prosperidad pa un y tur. Na timon di Partido di Pueblo Arubano tin Mike Eman, un persona cu ta goza di un popularidad y stimacion enorme den nos pueblo y esaki cu su debido motibo.

Manera a keda expresa pa varios persona e anochi aki, Mike Eman tin balornan tanto humano como profesional cu ta digno di admiracion. E respaldo cu e ta goza di dje awendia den e pueblo Arubano, ta algo cu el a gana cu cada pensamento, accion y resultado di su parti. “Como lider, persona y hende cu mi conoce, eynan so el a duna mi confianza caba. Mirando kico el a haci den cuater aña mi no tin nada mas pa desea di Prome Minister. El a haci bon trabou sigur sigur,” un simpatizante di districto di Santa Cruz a comenta.

Hustamente e contacto estrecho cu su pueblo, ta loke ta permiti mas y mas hende cada dia pa duna fe di e bon boluntad cu lider di partido AVP tin pa cu nos isla. Cada bes cu e cuminda, combersa y bishita un persona, e ta transmiti inmediatamente su calor humano y sinceridad. “E ta un shon di hende; no pa ofrece of duna hende cos, pero pa e manera cu e por drenta un cas. Aunke e porta por ta cera, esaki ta habri automaticamente. Esey mi por a siña di cana banda di dje. Siña conoce Mike Eman. Kier men, unda cu e yega portanan ta habri,” e mesun meneer a sigui bisa.

“El a haci bon pa Aruba, el a priminti y cumpli den barionan. Ami ta biba na Cadushi Largo y unda cu el a pasa den mi bario, el a laga un stempel atras. Esey bo ta yama un lider. Pesey nos ta dune confianza y nos ta duna confianza pa cuater aña mas y mas cu esey; shen por ciento,” e meneer aki a bisa cu tur siguridad. Ora cu a puntr’e pakico e ta afilia na e partido berde, el a contesta sin bacila “Pa e bon trabou por sigui, pesey mi ta AVP!”