“Cu asombro mi a tuma nota di contestanan di Parlamentario di MEP, Endy Croes tocante e articulo di mi riba faha di horcan. Normalmente lo mi no a contesta y manera bieunan sa bisa ‘let the fly fly’. Pero tin un punto hopi preocupante cu a bin dilanti den su articulo, unda e kier manipula cu datonan cientifico”, asina Ing. Mike de Meza, Parlamentario pa partido AVP a indica awe.Pa cuminsa el a tuma nota cu Endy Croes, mescos cu su famia, e Ministro Presidente, no ta compronde e materia di ciencia bon y ta bruha appel cu peer. “Ami niun ora a referi na e parti economico relaciona cu desasternan natural” segun Mike de Meza. “E punto cardinal cu mi kier a trece padilanti pa pueblo di Aruba den mi articulo tabata e mal informacion cu Prome Ministro ta duna. Segun Prome Ministro, Aruba ta pafo di e faha di horcan y esaki ta ERONEO!”Tempo mi tabata Minister, ami tambe tabata tende e tipo di fake-news nan asina y pesey como mandatario responsabel, mi a puntra un conseho na e departamento concerni. E departamento a verifica cu ‘National Hurricane Center’ y ‘World Meteorological Organisation’. E contesta tabata cu SI, Aruba ta den e faha di Horcan y manera ta indica den e raport di Meteo Corsou, e islanan ABC ta na e parti zuid di e faha di Horcan y NO PAFO! Pues tur aña nos pueblo mester prepara pa temporada di horcan y monitor datonan di nan servicio Meteorologico! E miho manera pa haci esaki ta, pa ta bon informa riba tur aspecto relaciona cu tempestadnan tropical. Si cuminsa mal informa bo pueblo, bo ta crea confusion innecesario, cu por crea consecuencia no desea despues. Adicionalmente mi kier corda Bo cu durante pasada di horcan Ivan, tabatin un “Hurricane warning” pa Aruba y durante pasada di horcan Felix tabatin un ‘Hurricane watch” pa Aruba. Pues ta di lamenta cu Prome Ministro no a tuma contacto cu expertonan prome cu e a duna informacion incorecto y despues e informacion incorecto aki ta bai pa pueblo tambe.”Loke a hala mi atencion tambe ta cu ala estilo di Donald Trump Bo kier manipula cu datonan cientifico o probablemente lo kier cientificonan manipula datonan pa asina e datonan indica loke ta bon pa Bo. Pensamentonan asina ta hopi peligroso y estilo di dictadura, unda cientificonan no mag duna informacion corecto pasobra e ta bay contra un maneho politico o economico”, segun Mike de Meza.Ariba 9 november 2017 UNESCO a accorda e ‘Recommendation on Science and Scientific Researchers’. Den e documento aki tin par di punto cu lo ta bon pa bo lesa, compronde y para keto ariba. Pues e idea di Bo cu datonan cientifico mester wordo manipula pa deseonan politico ta contra e recomendacionnan aki. Di dos tambe ta recomenda politiconan pa haci uzo di datonan cientifico pa nan decisionnan y no chupa esakinan for di nan dede.Aruba como miembro asocia di UNESCO mester sigui recomendacionan di UNESCO. Ademas den ‘The International Covenant on Civil and Political Rights y International Covenant on Economic, Social and Cultural Rights’, di Nacionnan Uni tambe ta indica e importancia di libertad di expresion di academiconan. Pues no manera bo ta sugeri cu cientificonan mester manipula datonan na bo antoho.”Finalmente, Bo a referi na hopi ‘Fortune 500 companies’ cu tabata presente na e reunion y cu Prome Ministro mester a manipula tocante posicion di faha di horcan pa atrae e companianan aki bin Aruba. Awo Bo por bisa nos ta cua di esakinan lo bin Aruba e aña aki ainda? E coalicion y partidonan den coalicion mester stop di manipula y gaña pueblo local y internacional pasobra na fin di dia e berdad lo alcansa boso engañonan. Miho cos Endy Croes por haci ta purba realisa con ridiculo e ta haci su mes cada biaha cu e papia of skirbi su storianan for di sla. Cada loco cu su locura!”