Prome Minister ta avisa trahadonan publico cu nan tin cu bay entrega sino nan lo no tin salario dentro di dos pa tres luna pero na mes momento cu e ta bisa esaki, Evelyn Wever Croes no kier papia di fixmento di su hendenan prome cu yuda pueblo.

Melvin Tromp di partido AVP ta mustra cu for di algun dia caba ya pueblo no ta hayando ningun noticia for di Prome Minister cu ta positivo, solamente ta e pinta un scenario macabro di economia di e pais pero sin solucion concreto cu su gobierno lo bay trece pa atende cu esaki.

“Como Prome Minister di e pais, bo mester ta e guia, e figura cu pueblo henter lo mira pa haya sa e solucion di loke ta pasando den nos pais y rond mundo pero aki ta tanto bal, ya cu tur loke ta bin dilanti ta e palabra sagrado di Evelyn Wever Croes y su partido, esta medida tras di medida.

Pa colmo ya caban Evelyn tabatin curashi di impone medida riba pueblo den un tempo cu el a priminti pueblo solucion pa tur problema, pues den e ambiente cu ta reinando aworaki, Evelyn ta sinti su mes comodo y den su vision politico.

Prome cu Prome Minister a bin dilanti y anuncia publicamente cu trahadonan publico lo tin cu bay entrega, el a dicidi di atende un reunion publico prome riba CITGO, pa confirma e areglo cu su gobierno kier cera cu CITGO pa asina absolve e compania aki di mas di 300 miyon di florin cu e tin cu paga pa incumplimento di contract.

Un reunion cu a wordo yama bou di presion di coleganan den coalicion pa asina por sigura cu e coalicion lo sigui dilanti sin problema pero a lo largo ta pueblo lo carga e consecuencianan di e terkedad aki.

E reunion riba CITGO tabata simplemente pa cuminsa habri caminda pa yega na solucionnan beneficioso pa amigo y famianan, pa sponsor  y otro sostenedonan y ora cu nos tuma nota di cierto desaroyonan cu ta tumando luga alrededor di e refineria, por mira cu ta fixmento di cos tin pa sigura cierto grupo of hendenan, di stabilidad financiero na luga di sigura pueblo un futuro financiero stabiel.

Mientras cu e desaroyonan aki ta tumando luga caba pa reparticion di propiedadnan di e refineria y CITGO,  nos por bisa cu ta practicamente bisto cu e director nobo pa Refineria di Aruba, tin nomber y faam caba, mirando su presencia caba den un compania cu e tabata kier a mira disparce for di Aruba.

Sinembargo ora cu cosnan planea no a sali na su bentaha, awor e oportunidad grandi aki ta surgi pa su persona y e stoel di director di RDA ta esun mas logico cu e tin cu ricibi y lo bay haya tambe segun informacionnan concreto cu nos a ricibi.

E tipo di desaroyonan aki ta bolbe confirma e mentalidad di un gabinete Wever Croes cu nunca tabatin pueblo na pecho, cu nunca a bin dilanti y duna pueblo algo positivo, duna espacio financiero pa nan por biba miho.

Gabinete Wever Croes tabata un gobierno di medida, un gobierno cu ta specialisa den ranca placa di pueblo y comercio, creando un inflacion cu awor lo bira ainda pio dor di e situacion di corona virus.

Anto ora cu pueblo di Aruba ta na merced di un gobierno cu no tin vision, un gobierno cu no ta sinti pa interes di pueblo, un gobierno cu a gaña pueblo pa haya pueblo su voto, e situacion ta bira ainda mas serio, sigur ora cu e Prome Minister Evelyn mes ta bin dilanti practicamente tur dia, pa recorda trahadonan publico cu nan tin cu entrega.

Ya Evelyn su gobierno a haci di nan parti caba, esta di entrega miyones na e compania CITGO pero pueblo tin cu wordo castiga pa tanto falta di capacidad di un gobierno sin vision y sin solucion,”  miembro di partido AVP, Melvin Tromp a declara.