Mester tin mas claridad riba con Enseñansa lo continua mirando cu e casonan local ta sigui aumenta. 
Oranjestad: segun sra Arends-Reyes ta sumamente lamentabel cu e casonan na Aruba ta asina hopi, algun siman atras nos a cuminsa cu algun shen y awor nos ta papiando di mil, shen caso y ta sigui conta. Por cierto, di curason nos ta desea cada un di e personanan aki un pronto recuperacion di e virus aki, tur hende na Aruba conose of tin un familiar cu ta purbando di recobra nan salud. Locual cu tanto a teme pe a pasa, caminda cu a conoce transmicion local y e chens ta grandi cu te awe ainda tin personanan cu ta canando rond cu ta un fuente of tawata un fuente sin cu tawata sa. Cada un persona tin trabou of scol y asina consecuentemente e casonan ta keda aumenta. Mester cuminsa evalua seriamente kiko ta considera e siguiente fase di medida si casonan no disminui of yega na un plateau. Aruba no por just keda test con bon nos ta prepara di berdad y keda test nos capacidad medico. Si ta imunidad na grupo ta buscando nos ta leu di yega esaki mirando cu 40% di e poblacion lo mester keda infecta y no conta mes cuanto caso lo tin di personan cu lo fayece. Nos poblacion ta keda cu 20 mil ciudadano cu ta grupo di risico y pa colmo tin indicacion manera a ser anuncia na Hulanda y Belgica cu bo por haña e virus mas cu un biaha. Locual tambe ta lamentabel y cuestionabel ta keda con ta anda cu e informacion di patiëntnan y esaki sigur Parlamento lo trata den e reunion di diahuebs proximo cu Minister di Salubridad. Politica of no hecho ta cu na momento cu cualkier profesional keda encarga cu un lista di patiënt e tipo di foutnan aki ta contra tur etica y ta keda inaceptabel. Locual tambe tin pueblo preocupa ta Enseñansa y muchanan na cas, kiko ta e plan di gobierno pa 3 di September, ta habri scolnan? Y si tin pensa cu aki 1 siman y mei nos casonan ta sigui aumenta ki plan tin pa continua cu Enseñansa? Con prepara nos ta di berdad. Mester bisa cu di parti di maestronan nos por a tuma nota cu di dia 20 di augustus nan ta na pia di trabou tur dia, nan ta reuniendo y preparando pa ki decision cu cai.. plan a, b of c. Pero no ta husto cu falta atrobe asina poco tempo y no tin claridad den ki rumbo gobierno lo kier continua mey mey di un contagio local di e magnitud aki. Sra Arends-Reyes ta spera cu gobierno ta den deliberacion constante cu stakeholders pa tuma e mihor decision. Mester cuminsa splica pueblo cu mas dato locual ta pasando na Aruba. En todo caso Enseñansa cu of sin Covid mester continua y e pregunta cardinal ta keda, gobierno ta cla pa anuncia kiko ta bai ta next? Mayornan y maestronan kier sa pa asina por wak con nan ta bai implementa nan plan di accion. E cursonan na maestronan no a ser duna manera cu a priminti, Setar ta cla pa tur hende ta online y duna un sponsering pa internet pa esnan cu no tin connecion, tur alumno tin disponibilidad di un ‘device’ y guia na cas? Of tur scol ta cla pa cuminsa pa cumpli cu e rekisitonan di hygiena y ventilacion? Si ta no, e scolnan cu no por cumpli ta hañando ayudo pa por cumpli? E scolnan cu a prepara y ta cla pa cuminsa ta bai haña luz berde pa cuminsa? Tempo ta core y Aruba ta sperando kiko ta e decision di gobierno pa locual ta trata Enseñansa y e futuro di nos muchanan. Spera di haña mas claridad pa e topico aki den e dianan venidero sra Arends-Reyes ta termina bisando.