CAFT a entrega diabierna dia 22 di juni nan ultimo recomendacion riba presupuesto 2018 unda cu nan a indica cu Gobierno a cumpli cu e recomendacionnan bou condicion cu e deficit di 2018 lo keda bou di esun di aña 2017, cu e dividendonan di companianan estatal keda materialisa y cu lo reduci e aña aki ainda e gastonan di personal. Ta trata di e suma di 12 miyon florin y mester reduci’e den un tempo di 6 luna. E compromiso cu Gobierno a haci cu CFT ta hinca den un plan di maneho di personal.
Parlamentario di AVP, mr. drs. Richard Arends, a manda un carta dialuna 25 di juni pa Minister di Finansa y Asuntonan Economico pa duna Parlamento un copia di e plan di maneho di personal nobo, cu lo resulta un reduccion di gasto di 12 miyon florin e aña aki ainda y sigui p’e cuadro financiero nobo. E cuadro financiero cu Gobierno a presenta anteriormente, tabata tene cuenta cu e aumento structural di gastonan personal p’e añanan venidero. A rais di e palabracionan nobo y compromisonan hasi cu CAFT, e cuadro financiero mester a cambia. Pa loke materialisa e recomendacionan Gobierno mester bin cu un cambio di ley di Presupuesto. P’esey a puntra minister na ki momento Parlamento lo ricibi un concepto di ley pa cambia presupuesto 2018. Asina aki lo por incorpora e recomendacionnan cu CFT a bin cun’e. Parlamentario Arends ta conclui esaki a base di e relato di prensa di CAFT. Sinembargo, Parlamento no a ricibi nada ainda.
Fraccion di AVP a compronde for di e declaracionan di CAft cu tin un plan di personal cu lo tin como resultado e reduccion di gasto personal di 12 miyon florin e aña aki caba. E fraccion ta preocupa pasobra di tuma e e salario promedio di un empleado publico y tuma e periodo di mita aña, ta papia aki di alrededor di 300 cupo di trabou cu lo bay perdi, of Gobierno mester bin cu cambionan drastico den e condicion secundario di empleadonan publico, pa por logra un suma asina substancial den e tiki tempo cu ta sobra di e aña aki. Den e ultimo 4 añanan e cantidad di empleado publico a baha segun e informenan a base di cifranan di DRH cu tabata wordo publica anteriormente. E gobierno actual, sin embargo, no ta duna claridad riba e desaroyo di cantidad di trahado den e aparato gubernamental.
Despues di 5 nota di cambio, e presupuesto 2018 ta conta cu un aumento di gasto di personal di mas o menos di 12 pa 13 miyon, un aumento di gastonan di oficina di 17 miyon. Tur esaki hunto a suma na 125 miyon extra na gasto compara cu e realisacion di aña 2017. Pa por a financia esaki, gobierno a aumenta BBO y BAZV, a expande e base di e impuestonan aki, pero tambe tin pensa di aumenta accijns e aña aki ainda.
Importacion di gasolin ta cosisti di dos ‘schakel’; door di e aumento di BBO y BAZV prijs di gasolin lo conoce un aumento di 2.5%. E lo afecta e margen di e importador como e detayista, e doño di e pomp di gasolin, tambe lo sinti e efecto aki, segun Parlamentario Arends. Lo tin un aumento di gasolin di 5%, cu ta 10 cen, a partir di dia 1 di juli. E aumento di prijs di gasolin riba mercado internacional ta premira pa continua den e lunanan nos dilanti. Ainda falta e aumento di accijns cu Gobierno ta spera di ricibi e aña aki ainda manera presupuesta. Fraccion di AVP no sa si Gobierno lo bay duna ehecucion na e plan aki, pero e ta hinca den presupuesto. Den caso cu gobierno no aumenta mas accijns, lo mester bay bek Parlamento cu un cambio di ley hunto cu e otro recomendacionan cu CAft a trece dilanti.
