Parlamentario drs. Mervin Wyatt-Ras diamars tabata hunto cu otro coleganan di fraccion di AVP dilanti e edificion di ex-DTI na Pos Chiquito. Wyatt-Ras a expresa su desaprobacion pa loke ta trata e proyecto di Dump cu lo establece den e edificio aki.
Wyatt-Ras a trece padilanti cu e ta para banda di unda gobierno di AVP a drecha carreteranan y a construi e green corridor. Atardi hopi hende ta cana riba e caminda destina pa peaton cu nan yiunan y muchanan por hunga y haci ehercicio na e aparatonan cu tin bandi caminda y pasa un rato agradable. Sinembargo awe contrario na AVP, loke e gobierno di MEPPORRED kier duna pueblo di Pos Chiquito ta un Dump. Mervin Wyat-Ras ta haya esaki un falta di respet pa nos hendenan. Pa e edificio aki no tin ningun openbare aanbesteding cu e tuma lugar. Simplemente e ta un proyecto pa paga compinchinan cu a sostene nan den campanja. E ta manera un “voldongen feit” cu djies tin cu paga. No a tene cuenta e hinderverordening.
Paso e edificio ta memey di nos hendenan, mester tene cuenta tambe cu hygiene. Reciclahe memey di poblacion lo trese molester cun’e pa nos hendenan di bestianan manera kakalaka, djaka y raton. Wyatt-Ras ta expresa palabra di elogia cu cuidadanonan den Pos Chiquito cu a sera cabez pa lanta contra di e proyecto aki, encabeza pa sra. Desiree de Souza-Croes. Esakinan ta voluntarinan di Pos Chiquito y esnan cu ta stima Pos Chiquito. Nan ta colectando firma contra di e proyecto aki. Mientras antes e facilidad aki tabata un Centro Comercial unda hopi hende tabata haci nan compras, awe e lo bai bira un Dump. Esaki sigur ta un ofensa pa pueblo di Pos Chiquito sin mira nan color politico. Tin hopi otro lugar pa bin cu un proyecto asina, p.e. den e zona industrial. P.e. na Parkietenbos unda e Dump ta ubica ya caba tin un facilidad. Wyatt-Ras ta referi na e proyecto di parke di Molina na Urirama cu gobierno a base di protesta a stop, mientras cu tabata trata energia solvable y limpi y awor ta bin pone un proyecto di sushi y di Dump memey di nos hendenan di Pos Chiquito? Unda tur e argumentonan di higiena y salud cu ta ser uza a keda?
Aki cu ta trata desperdicio y no tin un estudio di su impacto haci, tin alrededor hende ta biba, tin restaurant y supermercado serca y ta haci manera nada no a pasa. Esaki ta algo cu nos lo bai cuestiona minister. El hay’e obliga ta bin Parlamento despues cu ya el a duna declaracionnan y nos por a tuma declaracion di minister Maduro cu a confirma cu lo tin un proyecto di reciclahe. Un proyecto di Dump pues. Minister encarga mes ta declara cu e ta un proyecto cu ta cai bao Serlimar. Un gobierno cu ta pretende di ta transparente. Un gobierno cu ta pretende di ta integro, mester informa nos hendenan y tuma nan opinion den consideracion y meser a consulta cu Parlamento promer cu tuma cierto decision.
Wyatt-Ras ta trece padilanti cu entrante 1 di juli nos mester paga BBO mas halto e ta un atraco ariba cartera di nos pueblo. Di otro banda gobierno ta bai paga su amigo un suma cuantioso di alrededor di 720.000 florin pa anja pa un edificio inclui utilidad. Pueblo por mira e ora unda su placa cu e ta saca foi su cartera cu dolor ta bai. Pueblo mester habri su wowo pa wak e mentiroso nan cu envez di pone hende central ta pone interes di amigonan central. Envez di baha gasto a subi nan gastonan en comparacion cu gobierno anterior. Envez di baha debe cu nan a critica nan a crea debe. Un gobierno cu no a cumpli cu su promesanan haci na pueblo. Wyatt-Ras ta spera cu pueblo keda alerto y sali na vanguardia di esnan cu ta biba na Pos Chiquito.
