Como miembro di e delegacion di Aruba na e Interparlamentaire Koninkrijksoverleg (IPKO) tumando luga e siman aki na Den Haag, Hulanda, Parlamentario di Partido di Pueblo Aruba (AVP), Ing. Mike de Meza ta lamenta profundamente e atraso cu partido MEP a causa Pais Aruba den loke ta topico di energia alternativo door di a para tur proyecto cu tabata andando. P’esey mes, de Meza no ta kere cu MEP tin moral papia di cambio climatico na e encuentro aki.
“Nos tabata orguyoso di con Aruba tabata den un direccion reconoci regional y mundialmente door di Gabinete di Hulanda, Merca, pero tambe otro pais rond mundo y tabata ehecuta trabounan grandi. For di fin di 2017 cu gobierno di Aruba a cambia, por mira cu tur proyecto a caba,” e Parlamentario a declara.
Ta añadi cu nada a bin durante seis aña riba e topico aki, mientras cu awe bo ta scucha cu Hulanda ta pone enfasis grandi un bes mas riba esaki, pero lastimamente cu Aruba a perde seis aña largo despues di tabata un direccion hopi cla. “Awo bo ta wak con otro pais ta enfoca riba loke nos a haci caba 10 aña pasa,” de Meza a bisa.
Den e programa di diabierna a papia inicialmente riba e topico di pasado di sclavitud. Aki vocifera cu no ta djis pidi pordon pa pasado, traha un museo na Hulanda y kere cu, cu esey tur cos ta bon. Tin discusion fuerte di parti di tur isla den direccion di Hulanda. Ta anticipa cu lo tin basta discusion pasobra Caribe Hulandes no ta di acuerdo con Hulanda kier cana e caminda aki.
Den e di dos parti a trata cambio di clima y uzo di energia alternativo; tambe cu discusionnan sumamente interesante cu a laga e impresion atras cerca de Meza cu ta un lastima con a perde e ultimo seis aña danki na gobiernonan di MEP/POR/RED y di MEP/RAIZ.
Como parti di Gabinete Eman I y II, de Meza ta recorda bon e trabounan grandi y reconoci na nivel regional y mundial caminda a traha programa pa hubentud conoce un manera mas eficiente di consumi energia y proteha e planeta. Di mesun forma a conscientisa pueblo riba cambio di custumber, a traha cu expertonan local e internacional for di unda a saca hopi informacion na beneficio di Pais Aruba.
A planea e cambionan necesario pa e back up di WEB y Elmar pa crea e posibilidad di tin un penetracion mas grandi di energia alternativa y un transicion pa diferente tipo di recurso bayendo pa gas, solo, biento, etc. Optimalisando asina e proceso. De Meza: “Tabatin tur e trabou ey y Gabinete Mike Eman I y II a traha cu Carbon War Room, Rocky Mountain Institute, a bin cu TNO, a traha cu TU Delft riba e direccion cu awo mundo henter ta bay, pero cu den actualidad Aruba a keda pega.
