Den forma con cla Parlamentario Mike de Meza di fraccion di AVP a mustra cu nan no ta di acuerdo cu e paketenan di medida cu gabinete Wever Croes a presenta den su concepto di ley di presupuesto cu a wordo trata ultimo dianan den Parlamento.
De Meza a enfatisa cu e medidanan aki lo bay tin consecuencia grandi pa henter pueblo pero principalmente pa esunnan di menos entrada kendenan lo wordo perhudica pa e medidanan aki, cu simplemente no tin hustificacion pa wordo introduci na e momentonan aki.
“Nos ta bay mira un efecto increibel y pisa pa henter pueblo caminda un di nan ta e aumento di BBO y BAZV cu lo bay subi cu 6% y efecto cu esaki ta bay tin un efecto pa e poder di compra y economia di Aruba, lo bay ta dramatico.
Pa duna un ehempel simpel di esaki ta na momento cu e aumento drenta den efecto, ta bay mira un aumento den prijs di gasolin di entre 9 pa 10 cen inmediatamente y riba dje tin otro medida cu ta e 10 cen di accijns riba gasolin, caminda si e prijs di gasolin keda para na unda cu e ta awe, pueblo lo mira durante di curso di lunanan cu ta bin, un aumento di 20 cen riba un liter di gasolin.
Esaki lo trece complicacion pa economia en general y lo tin su efectonan sumamente grandi pa inflacion y tur esunnan cu ta duna servicio di transporte manera chauffeurnan di autobus pero tambe pa servicio di Arubus y taxistanan, tourbusnan, tur lo mira un aumento dramatico riba nan operacion pero tambe den tiendanan lo bay mira un aumento basta dramatico riba prijs di productonan.
Esaki a nifica cu su efecto ta bay ta bastante pisa pa hente comunidad di Aruba y sigur pa esunnan di menos entrada y pesey nos ta insisti cu tin otro forma pa atende cu locual cu nan ta bisa ta e situacion financiero.
Nos tin cu corda aki cu na momento cu nos a drenta den gobierno na 2009, tabatin retonan sumamente grandi y tur gobierno na nan entrada di gobernacion ta haya nan mes enfrenta cu retonan.
Locual ta importante ta pa bo analisa, pa bo tin vision y pa bo lora manga di cuminsa traha y loke nos por mira aworaki lastimamente cu e gobierno di coalicion aki ta tipifica su mes pa persecucion politico cu ta di lamenta y medidanan.
E ta locual historicamente nos a conoce tambe di e partido mas grandi den e coalicion aki cu ta MEP, cu prome cu Status Aparte tabatin medidanan basta pisa cu a wordo tuma, den añanan 89 bay ariba, tambe a tuma medidanan basta severo hunto cu persecucion politico.
Den añanan 2001 pa 2009 esaki tabata e accento di e gobierno cu tabatin signatura di MEP tambe medida, medida, medida y ora cu bo mira, no tabatin control riba gastonan caminda tabata yena e aparato di gobierno cu conoci -y famianan y ta yena esaki riba un nivel cu ta bira iresponsabel y ta pesey e gastonan ta sigui aumenta.
Awor na 2017 MEP ta haci entrada den e gobierno nobo y inmediatamente por a nota cu ta bay na practicanan tradicional caminda ta introduci medida, lubidando tambe riba e efectonan dramatico cu esakinan lo bay tin riba pueblo, caminda e poder di compra lo cay y inflacion lo aumento basta dramatico.
Pero tin otro forma cu por stimula economia dor di e medidanan aki ta bay mira un caida den nos economia cu lo bay afecta e bida socio economico na Aruba dramaticamente y esey ta di lamenta pa motibo cu nos a spera cu for di experiencia y for di historia, MEP lo a saca e conclusionnan ey y nan lo a bay mucho mas cauteloso cu e tipo di accionnan aki,” Parlamentario Mike de Meza a mustra.
