Den un reunion solicita pa fraccion di AVP cu Prome Minister riba e vision y posicion di gabinete Wever Croes relaciona cu Venezuela, lamentablemente gobierno no tabatin informacion pa duna y nada di  kico ta wordo haci y kico ta tumando luga.

Lider di fraccion di AVP den Parlamento, sr Marlon Sneek a mustra cu mientras cu Prome Minister di Corsou practicamente tur dia ta informa tanto pueblo como Parlamento di su pais riba e desaroyonan cu tin, Premier Evelyne Wever Croes no por a duna ningun informacion den e reunion aki.

Pa ilustra con serio e falta di iniciativa di gobierno pa informa pueblo y parlamento pa asina calma e tension cu ta lanta, Parlamentario Sneek a pasa grabacion di un entrevista c’un oficial di gobierno, y persona aki ta bisa cu Hulanda tin base militar tanto na Aruba como Corsou y nan ta considera Hulanda como un di e paisnan agresor contra Venezuela.

E persona aki a mustra cu su gobierno por atende cu e dos basenan aki sin problema y cu Venezuela ta conta c’un sistema anti misil aereo di mas moderno na mundo.

“Ta cosnan serio ta pasando pero e unico expresion cu nos por scucha for di prome minister Wever Croes, ta cu loke tur hende tin cu haci ta resa pero di un vision, di un plan of di kico e ta papiando cu gobierno di Reino, ningun hende ta na altura.

Ta mesun prome minister aki hunto cu su minister Dangui Oduber na 2016 a cuestiona y bagatelisa un plan cu a wordo hinca den otro na 2016 caminda entre otro minister Dangui a critica severamente un plan cu a wordo hinca den otro den un eventualidad si algo pasa na Venezuela y con tin cu atende cu esaki.

“Damgui dia 14 di september a desbarata e plan aki for di otro, mas informando pueblo cu gobierno e tempo ey kier lanta un campo pa refugiado den Centro Deportivo Betico Croes pa despues traslada e campo aki pa Little League Ballpark na Dakota.

Awor cu nan ta den gobierno, no tin ni vision, no tin ni plan y prome minister ta manda tur hende bay resa y no ta prome bes cu e minister di asuntonan general, no ta na altura di kico ta pasando riba e isla aki.

E no tabata sa di decisionnan cu su gabinete ta tuma, kico su ministernan ta haci y semper e tin cu bay puntra kico ta pasando y den un caso asina serio manera e desaroyonan cu tin na Venezuela, tampoco e por a splica Parlamento ki plan su gobierno tin y kico ta su expectativanan of cual palabracion tin cu gobierno di Reino of otro instancianan.

Prensa ta informa cu tin hende a yega aeropuerto Reina Beatrix for di Venezuela y solicita mesora pa asilo politico  pero gobierno no tin informacion pa duna pueblo y tampoco duna Parlamento,” Parlamentario Marlon Sneek a mustra.