Diabierna ultimo a yega Parlamento e pakete nobo di medida cual gobierno lo bay pidi aprobacion di Parlamento pa esaki pero realmente Partido AVP ya tabata na altura di otro pakete di medida pero ningun momento por a pensa cu e actual gobierno por a pensa pa un rato cu e pais y pueblo, lo por carga un pakete di medida semehante.
Lider di partido AVP, sr Mike Eman a mustra dialuna mainta tempran cu ta trata di un pakete di medida, caminda hopi bes institutonan local di conseho ta tog indica pa busca fondonan pa gobierno pero den e caso di e proximo pakete di medida, e conseho di Raad van Advies, ta indica cu e pakete di medida aki ta bay ta devastador.
“AVP a haya e conseho tambe di Raad van Advies riba e leynan cu gobierno ta presentando na Parlamento pa aumenta tur tipo di impuesto y caminda Raad van Advies den un forma hopi cla, cu e impacto di e medidanan aki, ta bay afecta comercio en general na Aruba, ta bay afecta poder di compra na Aruba, ta bay afecta turismo.
De facto na tur esaki, Raad van Advies ta mustra cu si tuma tur e facetanan, si e clima di inversion, si di comercio, si e poder di compra tur esakinan wordo afecta, practicamente por papia di un crash economico cu e pakete di medida di gabinete Wever Croes kier bay introduci.”
E lider di AVP a sigui mustra cu ora cu tuma nota di contenido di e pakete di medidia nobo aki, tur hende lo realisa e motibo di e preocupacion grandi cu Raad van Advies a conseha gobierno pa no presenta e ley aki na Parlamento, ya cu consecuencia di e leynan aki lo ta ‘ingrijpend.’
“Raad van Advies ta papia di ‘rigoreuze maatregelen met ingrijpende gevolgen’ pa henter comunidad y e medidanan aki lo ta no uno of dos pero hasta te dies mas pio cu e pakete di medida cu ya caba e gobierno aki a introduci inicialmente, cual medicanan aki caba tin nos pueblo, den un sufrimiento total, poder di compra totalmente a wordo afecta y costo di bida pa nos conciudadanonan a bira impagabel.”
Mike Eman a sigui mustra cu gabinete Wever Croes ta bay introduci un BBO adicional riba tur importacion, caminda tur cos cu wordo importa, na e momentonan aki, ta bay wordo aumenta cu 6%.
Pues si invoerrechten tabata 12% , awor lo bay bira 18%, si e tabata 18% awor tur hende lo bay paga 24%, si e tabata 24% awor lo bay paga 30% y tur tasa di importacion ta bay wordo aumenta cu 6% caminda ya caba gobierno a bisa di ta spera di lo bay haya cerca di 35 miyon extra na entrada cu e medida aki ta trece cune.
Str Eman a sigui mustra cu gobierno ta bay aumenta deviezenprovisie cu 50% mustrando cu na e momentonan aki pa cada compra internacional cu un hende haci, cu tur importadornan, cu tur wholesaler, cu tur tienda, cu tur comercio caminda cu ora nan cumpra dollar pa busca mercancia pa asina consumidornan na Aruba por haya, ya caba nan ta pagando nan ta pagando un deviezenprovisie di 1.3% y esaki lo bay bira awor 1.9% cu ta un aumento di 50%.
“Esaki ta un medida cu ta bay tin implicacionnan grandi tambe hunto cu e BBO cu tabatin caba redobla, hunto cu tur e cambionan cu a wordo introduci durante ultimo temponan, awo cu e 6% di BBO cu importacion, cu e aumento aki di deviezenprovisie, nos por papia di un resultado sumamente negativo riba prijsnan den comunidad.”
Fuera di e aumentonan impactante aki, lider di AVP a sigui mustra cu gabinete Wever Croes a dicidi cu ta bay elimina e tarifa special cu tin pa esunnan cu ta manehando hotelnan na Aruba caminda na e momentonana aki, tin tarifanan special pa hotelnan pa asina nan por inverti y drecha e calidad di e producto di nan hotelnan pa asina Aruba keda competitivo.
“Esaki a funciona tremendamente creando desaroyonan positivo caminda por scucha ministernan actual papia riba e hecho cu revpar a subi pero esaki a subi dor cu e hotelnan a mehora nan producto, mehora nan servicio, tur esaki pa motibo cu tin un ley cu ta duna nan incentivo y e ley aki ta bay wordo elimina pa e hotelnan.”
Tambe gobierno ta bay kita for di ATA, hustamente na un momento cu nos pais ta pasando den un preocupacion sumamente grandi pa locual ta turismo di Aruba, caminda prome cu e corona virus nos por a mira cu na Januari turismo di Aruba a conoce un caida di preocupacion y a conoce un caida den e revpar.
Tur esaki sin e influencia cu nos ta mirando na e momentonan aki den e mundo di crucero, den e mundo di biahamento, cual desaroyo tin aerliñanan hopi preocupa cu henter e virus aki ta causando un temor cerca clientenan, caminda tin clientenan cu no kier biaha mas, cu no kier bay riba crucero.
Anto kico nos ta mira cu ta hustamente mey mey di tur e incertidumber aki, gabinete Wever Croes, a dicidi ya caba for di luna di november di 2019, caminda AVP a anticipa caba for di november ultimo cu e aña aki lo bay ta un aña dificil, pero nos a mira cu mercadonan cu ta competitivo pa Aruba, cu tabata cera pa motibo di dañonan di horcan, ta bay habri y riba dje awo ta bay kita 35 miyon for di presupuesto di promocion di ATA,” lider di AVP a mustra.
