Mey mey di un serie di atraco cu a tuma luga den ultimo dianan, gabinete Wever Croes tampoco kier a keda leu y den un forma inespera y pa sorpresa grandi di pueblo, nan a tira un para formal riba cartera di tur hende, anunciando un aumento di BBO di 6% pa luna di juni.
Parlamentario Arthur Dowers di fraccion di AVP ta mustra cu aki no tin mucho diferencia ya cu gobierno no mester uza arma pa atraca pueblo, pero ta haci esaki mal uzando 12 parlamentario como arma di atraco, kendenan no tin nada di bisa den henter e asunto aki.
“Ta net e gobierno aki na inicio a papia di un era nobo pa Parlamento, un gobernacion di transparencia y tur cos habri, un gobierno cu ta sincero cu pueblo, pero cu a transforma su mes den un gobierno cu no tin net nada pa pueblo.
Den casi 150 dia di gobernacion, gabinete Wever Croes ainda no a duna pueblo ni un solo beneficio, ni un solo depchi den su cartera pero si ta anuncia cu e lo hinca man y ranca 10% for di pueblo tur luna pa cubri un maneho cu pueblo ainda no tin nocion kico esaki ta.
Tanto promesa cu a wordo haci na pueblo, tanto siguransa cu pueblo lo bay dilanti cu partido MEP den gobierno, cu gasolin lo baha, prijs di awa y coriente lo baha, lo elimina hedging pa esaki, lo percura pa solucion pa dump, lo soluciona situacion di finansa publico den 30 dia, lo baha edad di pensioen, lo elimina criminalidad den corto tempo y cantidad di otro promesa mas.
Den e prome gran anuncio di e gobierno nobo di Evelyne Wever Croes sinembargo, pueblo no por mira ni sombra di e promesanan aki haci den campaña electoral, den ningun skina y ningun caminda ya cu realmente gobierno no tin algo drechi pa ofrece, ni sikiera un programa di gobernacion riba cual pueblo por mira kico lo bay wordo haci.
Ora cu nos tuma nota den un carta di CAFT cu ta mustra gobierno cu su plan di medida no ta representa ningun reduccion di gasto di gobierno, e ta bolbe mustra riba otro tipo di atraco contra pueblo, contra e pais.
Mas ainda ora cu CAFT señala cu minister Scorpion ta bay strica 20 miyon di loke BBO lo trece den caha di gobierno, pa e por atende cu su asuntonan den su ministerionan, caminda ningun otro minister lo wordo beneficia di e forma aki y tur esaki riba custia di pueblo.
Ta tristo pa nos tin cu mustra cu aki Minister Presidente Wever Croes, ta dispuesto pa sacrifica pueblo, pa ranca placa di pueblo, pa aumenta costo di bida na casi 10% pa e por tene minister scorpion contento, pa e por haci loke cu e kier sino no tin gabinete Wever Croes.
BBO no ta wordo aumenta pa paga proyectonan di PPP ya cu gobierno di AVP a cuminsa paga esakinan caba sin cu mester a tuma medida, sin cu mester a ranca placa for di pueblo den e forma con gobierno di coalicion ta determina pa haci esaki awo.
Pueblo no ta bin na turno cu gobierno di MEP y di un scorpion cu semper a busca pa su mes y awo ta pone Prome Minister castiga pueblo pa e por haci awor loke antes e no tabata por a haci,” Parlamentario Arthur Dowers ta declara.
