Den fin di siman por a tuma nota pa loke ta e testnan cu mester wordo haci ora cu pasaheronan yega Aruba, tin algo cu ta hole masha stinki mes, segun marlon Sneek, lider di fraccion di AVP a declara durante conferencia di prensa.
Para dilanti di eficio di aerouerto internacional Reina Beatrix, Parlamentaro Sneek a mustra cu ta inaceptabel pa den un situacion covid-19, caminda e pais den su totalidad ta pasando den situacionnan dificil, gobierno ta corta den salario di ambtenaarnan, otronan cu a perde nan salario completo, otronan cu ta depende di un voedselpakket, tin mandatarionan ta sinta ta pensa con nan por fix nan mes.
“Mandatarionan cu ta sinta pensa con nan por yena nan saco y esey no ta aceptabel riba e pais aki y pesey awe nos ta mira con Hulanda ta pone tanto presion, caminda ta bisa awe cu nan ta bay traha ‘rond om de regering,’ pa motibo cu nan no ta confia gabinete Wever Croes mas.
Hulanda ta mirando cosnan for di sla tumando luga y apesar di esaki no tin ningun musca ta bula.
Tur hende por a mira y lesa riba e webpage di BoInformado.com cu a bisa cu aparentemente lo tin un comerciante cu kier a cumpra dos Minister.
Shonnan, esta Ministernan, bo tin presenta na OM y eynan entrega un keho formal, ya cu ta inaceptabel cu tin algo asina aki den prensa y Ministernan ta haci manera cu niun musca a bula.
Pasobra tin cosnan straño cu a tuma luga akinan segun e publicacion ya cu supuestamente na salida, a wordo bisa cu ta e lab di hospital ta esun cu lo bay haci e testnan riba pasaheronan cu yega.
Direpiente tin hendenan cu ta yamando comerciantenan puntrando pa un ‘donation’ pa cumpra un mashin, diripiente tin laboratorionan priva ta yama trahadonan di hospital, ofreciendo e trahadonan aki trabou.
Pero con nan por ofrece e hendenan aki un trabou pa bin test pasaheronan na aeropuerto si nan no a haya nada for di gobierno? Si nan no a haya nada for di Minister?
Shon Minister, si tin algo robes akinan, wak pa bo persona coregi esaki ya cu e no ta aceptabel Minister Dangui Oduber, cu bou di e situacion cu en pais aki ta pasando aden, ta purba di regel cos, ta purba di fix cos, manera a wordo publica riba e webpage di BoInformado.com.
Nos a scucha bon cla cu tin cu busca un mashi, hasta cu lo busca un mashi ‘refurbished’ pero aki atrobe, ta apenas e malesa aki a cuminsa algun luna atras, pues ta di cual mashi refurbished nos ta papiando di dje?
Refurbished ta ora un mashin di añanan bieu anto e ta wordo refurbished pa pone den bon estado y awor ta papia di un mashin di 3 miyon florin y cu aparantemente hospital no tabatin placa pa cumpra e mashi aki.
Sinembargo ora cu analisa e situacion aki, por conclui cu simpel 22 mil pasahero cu yega Aruba for di exterior, ya ta saca e suma di 3 miyon aki cu e mashin ta costa.
Pues tin un hende cu tabata prepara pa strika placa na grandi, caminda den e parti inicial awor ora cu ta cuminsa restart e buelonan, e situacion no ta manera cu mester ta.
Sinembargo despues ora cu cos normalisa y cos ta biento en popa y Aruba yega su un miyon, un miyon y pico turista cu ta yega nos isla, nos ta papiando cu ta cobra 75 dollar pa turista haci e test aki, nos ta papiando di un suma astronomico di 75 miyon dollar, c’un hende tabata di bay strika. Un hende tabata di bay drumi y bira miyonario na cas.
Awor ta lanta e pregunta di con nos no ta haci manera antes, tempo prome cu e covid-19, caminda esunan cu tabata bin for di paisnan Latinomericano, mester a bin den e caso aki c’un carchi gel, riba cual ta mustra cu e persona tin tur su enternan, cu el a tuma tur su priknan y tur cos ta na ordo y e ora nan por drenta Aruba.
Cualkier turista cu ta bay bin Aruba, ta haci un reservacion, no di awe pa mayan pero for di lunas adelanta prome cu e biaha pa Aruba, pone como exigencia cu si nan ta bin di paisnan cu risico, cu e turista tin cu haci un test na su pais y ta bin Aruba cu e test ey cu no tin mag di ta mas bieu cu dos siman y cu esey nan mag drenta nos isla.
Pakico ta bay crea un cos cu ta bay trece problema y ta bay trece posibilidad pa fixmento y hortamento shonnan,” Parlamentario Marlon Sneek a declara.
