Despues di a reuni cu ex Promer Minister di Aruba, mr. Mike Eman, e prome mandatario Hulandes Mark Rutte a bisa cu su amistad cu Eman ta uno solido. “Nos a papia masha intensivo cu otro. Mi tin shete añas caba den e funcion aki y Mike un poco mas largo como Prome Minister di Aruba. No ta mucho tempo pasa cu el a baha. Nos a wak bek riba e periodo cu nos a traha hunto y constata cu nos ta haya cu e cooperacion cu tabatin entre Aruba y Reino tabata masha importante.”
Rutte a splica cu e y Eman tabatin nan desacuerdonan, pero cu esaki semper a bay den bon esfera. “Durante e añanan cu nos a traha banda y hunto cu otro, nos amistad a crece y a bira solido. Nos a papia largo, tambe riba e planan nobo di Eman di cual mi ta laga na dje pa haci nan conoci. Nos a palabra si cu unda cu nos por ta den futuro nos lo mantene contacto cu otro.”
Rutte: “Los di e plannan di Eman pa futuro, semper el a pidi atencion pa e relacion Aruba, Reino y Union Europeo. Kico esaki ta bay nifica pa e partinan di Reino den region Caribense y con haci uzo di e forsa di UE den esaki, nos tin cu mira ainda. Manera Eman mes ta formula ‘Laga nos experiencia kico kier men pa Hulanda ta miembro di Union Europeo y cu mira riba e resto di mundo. Esaki ta algo cu ta traha di ambos banda. Den e contexto aki tambe e combersacion entre ex Promer Minister Mike Eman y Promer Rutte a bai.