E discusion riba dunamento di tereno pa construccion di un hotel, den e caso aki Caledonian y tambe tabatin un demostracion na e sitio indica y por a scucha declaracion di lidernan cu tabata na e actividad aki, Parlamentario Benny Sevinger a declara.
Sinembargo e aspecto principal di loke a desaroya den fin di siman, tabata e declaracion di Minister Otmar Oduber ta purba haci y ta publica den medionan cu su persona simplemente ta trata di cumpli cu loke Benny Sevinger a firma.
E carta cu Otmar Oduber ta mustra, pero no e contenido, ta loke cu Benny Sevinger ta bisa cu nan a manda pa Marriott, y cual ta un carta firma door di su persona y Mike de Meza. Sevinger ta splica cu Caledonian tabata doño di un tereno propiedad pa mas di 20 aña, di un tereno di 10 mil meter cuadra. Pero e no tabata suficiente pa traha un hotel. A yega na un acuerdo cu Minister Marisol Lopez Tromp unda a firma un LOI na september, 2004. A sigui negociacion cu a conduci na un acuerdo di erfpacht cu a wordo firma dia 3 di mei, 2006. Cu esaki Caledonian ta haya 27 mil m2 pa un periodo di 60 aña. Den e acuerdo ta para cu nan mester construi un resort di timeshare di 481 camber. E acta aki ta valido te dia di awe. Si Marriott dicidi di cuminsa construi un hotel timeshare di 481 camber, no tin hende cu por para nan. Nan tin e erfpacht overeenkomst pa esaki. “Nada otro no ta conta te na e momentonan aki,” Sevinger a enfatisa.
Hecho tambe ta cu Caledonian a wordo bendi diferente biaha te cu el a yega den man di Starwood (Marriott). Nan tin derecho di construi un hotel manera ariba describi.
Den articulo 14 ta bisa tambe cu ta duna espacio pa parkeerplaats net na e area panort di The Mill, den saliña (Wetland) y pa 60 aña. Esaki, el a enfatisa, ta e documentonan cu tin riba mesa.
Caledonian no ta interesa pa traha e hotel y durante 8 aña a aserca Gobierno anterior cu nan no kier traha hotel y a bini cu un delegacion di Marriott. Nan kier pasa e tereno pa un desaroyador y solamente nan lo bay manehe. A bisa nan cu tin e acuerdo di erfpacht cu mester cumpli cune y awor kier bende e tereno pa 17 miyon sin cu pueblo ta haya nada. A bisa nan manda nan peticion por escrito, pero no a haci ningun compromiso cu e grupo aki. Simplemente a bisa nan manda nan peticion oficial riba papel pa e por wordo discuti. Riba esey ningun decision a wordo tuma pa cual e acuerdo di erfpacht cu Marisol Lopez Tromp a firma a keda vigente.
Den e carta Marriott ta pidi un 4 /5 star hotel cu casino riba e tereno di Caledonian; nan kier baha e cantidad di camber pa 350. Y Marriott ta pidi pa pasa tur share, esta bende e tereno. Y como reaccion a pone 4 condicion: Mester Letter of Intent riba e cambionan, pero cu ta “non binding”; pro e Gobierno awo a bay directamente riba un MOU y no a firma un LOI. Gobierno anterior a bisa tambe cu e cambionan ta suheto na negociacion cu mester tuma luga y esaki no a tuma luga mes. No tin ningun obligacion huridico cu ta mara pais Aruba te ora cu tin un contract firma despues di a negocia. Pues no a mara pais Aruba na nada. Por ultimo prome cu yega na negocia, mester un carta di di Marriott International cu nan ta duna aprobacion na e grupo di Marriott cu a aserca Gobierno pa nan negocia riba e tereno. E carta ey nunca a yega. Pues no a cumpli cu ningun di e 4 puntonan cu a wordo exigi ni door di e gruponan ni door di e actual Gobierno.
E carta tambe ta bisa cu e contracto ta wordo negocia door di DIP y representante di Marriott. Te ey e carta. Pues ningun Minister ta bay negocia.
