Partido AVP ta sigui hopi di cerca e ultimo desaroyonan cu tin rond di e compania local FMSA cu ta haci entrega di jet fuel y cu siman pasa di repiente a bin haya su mes den un situacion hopi peculiar y straño ora cu a constata cu e fuel lo ta contamina cu awa, segun lider di fraccion di AVP, Marlon Sneek a declara.

Sr Sneek a sigui mustra cu tin cosnan pasando rond di e tur e incidente aki  y cu ta duna e impresion bon cla, cu manipulacionnan ta tumando luga pa mete den e compania aki manera pa algun tempo caba tin indicacion cu lo ta tratando na haya e compania aki pa amigo y doñonan di partidonan politico den e actual gobierno di coalicion.

“Nos por a mira e caso aki caminda supuestamente lo tabatin awa den e fuel pa avionnan cu sigur a hala nos atencion pasobra aki nos ta papiando di un compania cu tin añas ta haciendo e servicio aki y di repiente nos ta mira cu ta creando un mal nomber riba e compania aki.

Di parti di fraccion di AVP nos ta bay haci pregunta pasobra loke nos ta hayando na informacion ta simplemente  cu doñonan di partidonan den gobierno aki, formando coalicion, ta esunnan cu ta interesa pa bira doño di FMSA.

Manera cu nos a bisa for di comienso FMSA ta di RDA y ta bay keda di pais Aruba, pasobra mesun figuranan aki tambe a purba di convence gabinete Mike Eman  II cu nan ta interesa den e proyecto aki y nos gobierno di AVP a bisa nan bon cla cu esaki ta algo di vital importancia pa economia di e pais aki y cu e mester keda den man di pueblo manera cu gabinete Mike Eman II a logra pa e bin den man di pueblo. Manera tur hende sa antes e tabata den man di Valero pero awe e ta den man di pueblo.

Nos a mira e manipulacion a cuminsa na 2017 caba na luna di november na momento cu RDA mester a finalisa e pagonan pa e bira doño total di FMSA, por a mira con e gobierno ora cu na a sinta, a boycotia tur cos, creando e impresion cu RDA no tin placa pa por paga pa por cumpra FMSA, pero si den presupuesto 2018 por a mira cu e compania tabatin placa pa duna gobierno placa di dividendo.

Pues un par di luna prome no tabatin placa pa cumpra nada segun gobierno a informa y cu RDA ta bayendo den rood, anto dos luna despues  e ora si e compania tin placa pa duna dividendo.

Nos ta mira  cu esaki ta un manipulacion di parti di gobierno di coalicion, nos a mira cu ‘fast fast’ a busca manera pa fix e cos, pero nos ta bisa pueblo cu nos ta bay haci preguna, pa motibo cu informacionnan cu nos ta haya, ta mustra cu ta doñonan di partido , principalmente e partido blauw, ta esunnan interesa den bira doño di FMSA y esaki nos ta bay informa comunidad di tur e cosnan aki.

Nos a bisa bon cla cu nos ta bay ta e wowo- y oreanan di  comunidad y esaki nos ta bay keda haci pasobra esey ta e meta di e hendenan aki, caminda e meta ta pa pinta cos malo, pa mustra cu e compania aki no por haci e trabou como debe ser, anto pa busca manera pa pasa e compania den man di terceranan, pa bende cu doñonan di partido, sponsornan di partido, pa asina nan por garantisa nan futuro.

For di fraccion di AVP y sigur for di partido AVP, manera cu nos a bisa den pasado caba, FMSA ta keda den man di pais Aruba, den e caso aki bou di RDA  cu ta un compania nacional di e pais aki y FMSA no mester wordo bendi.

E ta un compania rendabel, pasobra sin nan servicio ningun avion por bula, sin nan ora cu barconan yega Aruba mester fuel, sin nan WEB no por produci awa  y coriente y sin nan tur hende cu ta core nan auto,  no por core.

Kiermen placa tin sigur, un bon negoshi e ta  y pesey nan kier bay pase pa nan amigonan pa bay fix cos pa asina nan por haya nan ‘kickback.’

Wel di awe nos ta bisa cu e compania aki mester keda den man di e pais aki, e mester keda den man di RDA cu ta un compania estatal di gobierno di pais Aruba, di cada ciudadano den e caso aki,” lider di fraccion Marlon Sneek a sigura.