Maestronan a yega un biaha mas dilanti Parlamento pa mustra nan mal contento. Na varios ocasion a scucha tur nan puntonan, cuminsando cu e situacion na Traimerdia, pero e Minister ta intransigente y no ta scucha, ta bisa algo y ta haci lo contrario y cu a pone cu e maestronan a fada, segun Parlamentario Mervin Wyatt Ras a bisa despues cu e grupo aki a entrega un Manifiesto na Presidente di Parlamento, Ady Thijsen.

Mervin Wyatt Ras ta conta cu e maestronan ta exigiendo un fecha pa reunion publico. Den nan carta ta pidi e reunion aki lo mas pronto posibel y ta locual nan a vocifera tambe na e Presidente di Parlamento Ady Thijsen cu a bin ricibi nan carta. 

Disgusto grandi ta locual cu a crece na momento cu e Presidente di Parlamento a bisa cu lo duna contesta riba nan peticion den transcurso di 1 siman mas o menos. Esaki ta algo cu nan no lo acepta y a expresa esaki tambe bou di grito. Di biaha of por lo menos lo mas pronto posibel tabata locual e maestronan a bisa.

Preocupacion ta keda vigente, ta muchanan y maestronan al igual ta keda perhudica. Importancia di educacion ta locual cu nan ta evalua, esaki ta preocupacion real pa asina duna educacion entre tur e mal contento cu ta tumando luga na e momento nan aki.

Wyatt Ras a bisa cu diferente carta a bay di parti fraccion di AVP, sigur cuater te cu awo, p’asina yama e reunion publico aki pero envano y sin contesta algun. Preguntanan crucial y importante a bay dirigi na e minister en cuestion y te ainda no ta haya contesta. Mirando cu a yega na un otro manifestacion cu hopi disgusto entre e maestronan, ta na su luga cu nan duna atencion na e yamada aki.