E miembro di partido AVP, Melvin Tromp, ningun momento a wordo impresiona pa e supuesto keho cu Prome Minister Evelyn Wever Croes lo a entrega contra di su persona, despues cu su persona a entrega un keho na Ministerio Publico contra e Prome Minister.
“Tin un dicho cu semper mi a yega di usa ora cu mester bin cu pruebanan concreto di cosnan cu sa pasa caminda semper mi a mustra cu ‘papel ta skop.’
Loke tin riba papel bo no por cambia y historia politico di ultimo dos añanan aki, ta mustra bon cla cu Aruba tin un persona como Prome Minister, cu no por papia e berdad.
E supuesto keho cu e lo a hiba Ministerio Publico contra mi persona no ta impresiona mi na ningun momento, pero loke Evelyn tin cu haci ta yega Ministerio Publico di berdad y no bisa algo y keda sin haci.
Como Prome Minister, e señora politico aki lo bay den historia como e lider cu a gaña henter un pueblo den forma directo, caminda el a sigura pueblo pa lunanan largo durante di campaña, cu e lo soluciona e situacion financiero di gobierno, sin tuma medida.
Apenas algun luna den gobierno el a traciona pueblo den su totalidad dor di introduci e tradicional solucion di partido MEP, esta BBO y a tuma otro medidanan cu a ranca miyones for di cartera di pueblo, sin cu pueblo a haya algo bek di esaki.
Cantidad di promesa no a wordo cumpli, manera entre otro reduccion di prijs di awa y coriente, reduccion di prijs di gasolin, cu lo no hedge mas, aumento di salario minimo, reduccion di edad di pensioen, traha cu shete minister, reduccion di costo di biahamento di ministernan.
Anto un di e gritonan di Evelyn Wever Croes aki despues cu el a huramenta como Prome Minister, ta cu e lo bay reduci e gasto pa consehonan huridico cu ta paga na oficina di abogadonan, y cu su gobierno lo bay haci uso di huristanan den servicio di gobierno.
Pero kico a pasa, e bufete di su Papa a wordo converti den un e conseheronan huridico mas importante no di su gobierno pero sigur di companianan estatal cu ta cay bou di su responsablidad como Prome Minister.
Den documentonan cu nos a presenta na Ministerio Publico dialuna ultimo, tin copia di recibonan paga pa companianan estatal cu ta responsabilidad di Prome Minister y caminda por saca afo cu su persona ta na altura cu e companianan estatal aki, a haci uso di servicio di bufete di su tata.
Un bufete den cual Evelyn ta accionista, el a yega di traha pa e bufete aki pero ora cu el a bira Prome Minister, a dicidi di pone su accionnan den un tipo di stichting, cual stichting lo cobra su dividendonan tur fin di aña.
Na momento cu Evelyn no ta Prome Minister mas, e lo bira accionista directo bek den e bufete aki cu tur ganashi di dividendo cu el a ricibi di e bufete aki den e stichting mientras cu e bufete ta gana placa como representantenan di companianan estatal cu ta cay bou di su responsabilidad.
Loke mi persona kier conseha Prome Minister tambe ta cu ora cu e kier hunga e tipo di weganan politico aki caminda e lo demanda Melvin Tromp, lo ta bon e tuma tempo y scucha tur loke a wordo declara pa mi persona prome.
Tambe lo ta bon pa ora cu e bay prensa y insinua cu e entrega un demanda contra mi persona pa entregamento di kehonan falso contra su persona, e luga corecto pa e bay ta Ministerio Publico y sin duda esey sigur lo yuda e peticion di AVP pa Ministerio Publico investiga e desaroyonan preocupante cu Evelyn ta hibando como Prome Minister,” sr Melvin Tromp di AVP a declara.
