For di momento cu gabinete Mike Eman a tuma responsabilidad di gobernacion na 2009, un di e prome pasonan pa atende cu un economia dificil crea pa gabinete Nelson Oduber, ta di drecha mas tanto cu por e poder di compra di ciudadanonan.

Lider di partido Mike Eman a mustra den conferencia di prensa cu gobierno di AVP a pasa 8 aña den Gobierno ta drechando e poder di compra cu gobierno di MEP a daña entre 2001 y 2009.

“Ora cu nos a drenta gobernacion, ambtenaarnan a bisa cu nan a perde 25% di poder di compra bou gobernacion di MEP y esunnan cu ta haya onderstand,  pa 8 aña largo costo di bida a subi cu mas cu 25% y nan no a haya ningun ahuste di Gobierno di MEP.

Mesun cos cu esnan cu ta haya salario minimo of pensioen, henter e pueblo a biba entre 2001 y 2009 cu e mesun forma di gobernacion di aworaki cu nos ta mirando, esta medida, persecucion politico y fiesta pa friends and family y  awe e consumidornan ta paga pa esaki atrobe, ” sr Eman a mustra.

Pa drecha e situacion mester a duna diferente premie pa drecha e situacion, tanto ambtenaarnan como esunnan di sector priva, pensionado y esunnan cu ta haya onderstand.

Despues di drecha tur e daño cometi, awor den apenas un aña di tempo, ta bolbe biba e mal soño di un gobernacion di asignatura di MEP, usando e mesun patronchi di laga pueblo paga pa famia- y amigonan.

Rapportnan di BCA y CBS ta bisa cu inflacion ta matando poder di compra y e economia, cu lo causa desempleo tambe. E tristo ta, Eman ta bisa, cu su gobierno durante 8 aña largo a traha di dia y anochi pa drecha poder di cumpra y duna e pueblo perspectiva atrobe.

“Nos semper a bisa cu mester ta hopi cauteloso cu medida. Nos ta un pais chikito, unda e hendenan ta biba na e rand, no tin comercio super grandi.

Pueblo di Aruba tin entrada na rand y un tiki cambio ta bay di sobrevivencia pa pobresa. Un aumento di 10% den cuminda y transporte ta hinca esunnan cu ta biba na rand, den un pobresa. Igual ta conta pa negoshinan y esaki ta mira den rapport di BCA y CBS.

Tur esaki ta tumando luga y awor despues cu Banco Central a mustra e realidad di e situacion, E cifranan di inflacion registra pa CBS ta bolbe manda mensahe cla pa gobierno aki cu ainda no tin nocion di kico nan ta haciendo y cu nan no por sigui presiona pueblo di e forma aki.