Segun sra Arends-Reyes recientemente por a tuma nota di introduccion di un proceso nobo di douane cu ta exihi pa registra artefactonan electronico di pasaheronan. E solo hecho cu e noticia aki a causa hopi reacion negativo den pueblo y ariba rednan social desaprobando e tipo di registracion manual di artefactonan electronico pa pasaheronan. E tipo di manehonan aki ta hiba nos back den tempo caminda cu enbes di facilita e pasahero su biahe y hasi’e uno placentero e ta bira un caminda di cruz prome cu yega den avion. E ta crea un stress innecesario pa e pasaheronan prome cu biaha y mas papel pa cana cun’e. E solo hecho cu den e mundo cu nos ta bibando aden ta digital y e pasaheronan mester bai riba website, download y print un papel y subi nan auto y hiba e papel na un oficina di douane ta exihiendo demasiado di un pasahero segun sra Arends-Reyes. Casi e ta demotiva e pasaheronan pa biaha pa motibo cu ta pone exihencianan cu Aruba no ta custumbra cun’e como un pais cu a conose hopi innovacion manera ED-card digital y otro desaroyo manera kiosks na aeropuerto. Awor na momento cu biaha mester wak si tin vacuna di ‘yellow fever’ na Aruba, si no bo no por biaha tampoco y mester warda algun siman pa restock. Ta hopi lamentabel si mester biaha cu urgencia pero no tin vacuna na Aruba pa bo por drenta e pais cu ta exihi’e. Ta increibel con Aruba un pais den progreso ta bai atras asina den servicio na nos ciudadanonan. Na momento cu aumenta impuesto ariba un pais ta netamenta pa eleva nos calidad di bida den un manera of otro pero ta tumando nota cu ta atras nos ta bai den trato humano y servicio sra Arends-Reyes ta termina bisando.