Dialuna anochi tabata un encuentro magico na Cas di Partido AVP na Playa. Pa algun siman un grupo di amigo / boluntarionan grandi di partido encabesa pa parlamentario Benny Sevinger a traha incansablemente riba e proyecto di e kerstboom na cas di Partido AVP. 

E momento culminante a tuma luga dialuna anochi ora cu a invita e comunidad pa compaña /ta presente y forma parti di e cendemento di e kerstboom di partido AVP.

Lider di Partido Mike Eman a hiba palabra na e ocasion y a gradici un y tur pa nan presencia. Durante su discurso Lider di partido ta corda tur hende cu den e dianan aki ta momentonan importante pa brasa otro den e espirito di e dianan di Pasco pa hunto nos crea e compromiso grandi pa e cambio di aña. 

Mike Eman ta vocifera cu den comunidad ta sinti un inkietud/ deseo grandi pa cambio y esaki solamente por bin na momento cu uni forsa y hunto dicidi cu ora aña 2020 habri lo traha di dia y anochi pa realisa e cambio pa nos pueblo.

Alivio, felicidad y progreso ta biba den curason di e pueblo y dialuna anochi a comparti e espirito aki di un speransa nobo. Un peticion na creador pa guia, duna sabiduria, duna forsa y conocemento pa trece e comunidad hunto pa trece e alternativa cu e pueblo Arubano desea y merece, ta locual Mike Eman a bisa.

Gradiciendo tur pa nan presencia ta haci peticion pa corda cu tin cu lucha, traha y pone diferencia politico un banda paso nos tur ta ruman riba e isla aki. Sin distincion di e color, nos tur ta ruman. Discriminacion no ta biba den nos Pais.

Pa finalisa Lider di partido AVP Mike Eman ta remarca cu  “Aruba ta warda riba e partido AVP pa haci e diferencia, trece felicidad, Paz y harmonia bek den pueblo. Marcha lo marcha, lo cana bario pa bario, cas pa cas, skina pa skina pa realisa e compromiso cu e pueblo.