Awe, 3 di februari 2022 nos ta dispidi di un gran personahe, un baluarte grandi cu a bai laga nos: Fefe Bareño. Manera ajera mi ta corda e anochi cu nos a reconoce Fefe. Savaneta a bini hunto e anochi ey na cas di famia Paalman. Cu hopi aprecio y respet a honra e valornan grandi di Fefe. Homber di principio cu semper a para fime pa su conviccion. Mi tabata mucha, pero e legado di Fefe como un héroe cu a para cu nos partido na momentonan crucial a keda graba den mi curason. 

Na 1977 partido AVP tabata pasando den momentonan dificil y durante un reunion na Rooi Lamoenchi e pregunta a wordo lansa si mester dissolve partido of afilia na un otro partido. Eynan Fefe Bareño a lanta para, den su wayabero berde y a bisa cu si partido AVP mester bay eleccion cu un solo hende riba lista, anto e ta bay como e hende ey, pasobra cu partido AVP mester keda pa semper. Partido AVP a bay eleccion e tempo y na 1979 y bao liderazgo di e hoben Henny Eman hunto cu Fefe banda dije y personahenan manera Armand Engelbrecht, Adri de Palm, Frans Lejuez y mucho mas hobenan política AVP a haci un di e COME BACKnan político mas grandi na Aruba. Fefe tabata 4 anja miembro di Eilandsraad pa AVP, ta co-Fundador tambe di e sindicato FTA y un luchador grandi pa e derechonan di taxistanan na Aruba. Awe mas cu nunca un voz manera di Fefe lo a sali sostene e lucha di e taxistanan na Aruba.  

Hopi anja despues, riba e anochi special na cas di famia Paalman, den su pueblo na Savaneta, nos a reconoce Fefe un vez mas. Un momento yen di calor, amistad. Mi por a braza Fefe y gradicie un biaha mas. Un vez mas Fefe: DANKI ! Hopi forza na famia. Nos Creador sigur lo tin un lugar bunita pa un persona di tanto valentía, curashi y principio. Lo Bo keda pa semper den nos curason.