Entertainment Center tabata repleto di hende diasabra anochi na momento cu e partido mas grandi na Aruba AVP a tene su Congreso. Un anochi bon hinca den otro ta loke e publico grandi a presencia. Tur candidato riba e lista berde a presenta nan mes y nan vision pa Aruba. Ministernan a tira discursonan elocuente den cual nan a papia di tur loke a haci y loke falta pa haci. Mocionnan importante a wordo presenta y aproba pa tur presente. Despues e momento culminante a yega ora amigo y colega di partido Benny Sevinger a anuncia lider di partido Mike Eman. Candidato number dos riba lista berde Benny Sevinger a bisa cu ta un hende manera Mike Eman so por a guia y inspira un team asina bon prepara manera partido AVP a presenta e anochi ey. Cu musica alegre y bou fuerte aplauso Mike Eman a subi stage. E publico cu tabata warda e momento aki yega a bay bailando, gritando cu bandera den man dilanti pa yama bon bini na su lider.
Mike Eman a decica gran parti di su discurso na memoria di su tata Shon A Eman, kende a muri na un edad demasiado jong. Un par di dia prome cu el fayece 46 aña pasa e tabata para na e mesun lugar unda su yiu mas chikito tabata para diasabra anochi den Entertainment Center. Shon A tabata celebrando e victoria di su partido. “Riba e mesun suela aki partido AVP tabata na clausura di su campaña. Na e sitio aki pueblo a uni e tempo ey mescos cu nos a uni awe nochi. Para practicamente riba e mesun lugar aki, riba e anochi ey y na e mesun edad cu ami tin awe , mi tata tabata hunto cu miles y miles di ciudadano cu a aglomera riba e tereno liber banda di Wilhelmina Stadion. Nan a bin pa demostra nan sosten na un lider cu a lucha diez aña incansablemente den oposicion. El a lucha pa e identidad Arubiano. Pa e Arubiano sinti su mes orguyoso. Pa e Arubiano sinti su mes yama pa goberna su propio pais”. Mike Eman a papia cu un bos yen di emocion di su tata, e homber pa kende e tin asina tanto aprecio y cu a laga p’e un herencia di inmenso balor. Un tata cu te dia di awe e ta haya su falta den tur loke e ta haci.
“Mi tata Shon A Eman a ilumina, a inspira y a guia un pueblo cu tur su curazon y su alma y esey ta loke mi ta hiba cu mi den mi curazon”. 46 aña pasa Shon A Eman para na unda su yiu tabata para a proclama un Aruba nobo. Tur caminda na Aruba tabatin celebracion pa e victoria di AVP. “12 dia despues di a establece e soño di Arubianonan, na edad di 51 aña, nos Creador a yam’e cerca dje”. Mike Eman a bisa di kier haci un compromiso cu pueblo. Un compromiso inspira dor di su tata, inculca pa su mama y reinforsa pa su rumannan. E compromiso cu e lo no descansa te ora e soñonan den cada hogar y cada skina di Aruba wordo realisa.
Lider di AVP a papia tambe riba programa di partido den su discurso. Un programa den cual tur loke e pueblo ta anhela ta ancra den dje. Progreso y bienestar pa un y tur. Eman a papia di e cambionan grandi cu a tuma lugar durante e ultimo 4 añanan. Bario y scolnan a wordo drecha y esnan di menos recurso a haya e atencion necesario. Relacionnan den Reino a wordo drecha y a introduci un pensioen general. Turismo ta floreciendo y edificonanan monumental a wordo restora. “Nos a reconstrui, nos a renoba, pero e trabou no ta cla ainda. E ta un bon trabou, pero ainda falta”.
