Awe ta sin duda algun un dia grandi pa e consumidor na Aruba, como tambe pa e comerciante y e clima di inversion, segun Parlamentario mr. drs. Richard Arends miembro di fraccion di AVP, despues cu Parlamento di Aruba, a aproba den forma unanime, e ley di competencia husto cu ta na Parlamento for di aña 2013.
“E Ley di Competencia Husto, oficialmente yama ‘Mededingingsverordening’ na hulandes of ‘Anti-Trust Law’ ta ingles, ta un ley cu a wordo presenta na Parlamento for di aña 2013. Como iniciativa di Minister Hooyboer-Winklaar, colega Mike de Meza y mi persona a sigui cu e trayectoria aki treciendo algun cambio y cada biaha a mehorando e producto aki,” asina Sr. Arends a declara. “E ley aki ta basa riba hopi investigacion profundo y varios nota di maneho compila pa expertonan local y internacional.”
“For di awor e consumidor y e comerciante lo tin un ‘abogado’ pa garantisa un competencia husto. E fase inicial mester resulta den un autoridad cu lo percura pa tin un ‘level playing field’ den nos economia y na mes momento proteha e mercado local contra cualkier acuerdonan di prijs local y internacional cu por tin un influencia riba nos economia. Na momento cu ta papia di reanudacion di actividadnan den nos economia, ta momento pa e cosnan ta bon regla pa asina garantisa e posicion di e consumidor y e comerciante. E tratamento di e ley aki finalmente ta hasi esaki possible.”
Gabinete Mike Eman sigur a wak e necesidad di esaki y a logra aloca capital humano pa por garantisa continuidad di e proceso durante e añanan. “Mi no por keda sin gradici tur e profesionalnan di Departamento di Asuntonan Economico y Industria, como tambe e Departamento di Asuntonan Huridico, pa nan empeño y dedicacion na e dossier aki durante tur e añanan cu a transcuri. Aunke cu e cartera di Asunto nan Economico a conoce diferente titular nan a percura pa e proyecto aki sigui cana y cu un continuidad fiho”.
Parlamentario Arends a finalisa bisando cu e ta spera cu Gobierno aloca e fondonan necesario pa por cuminsa e fase inicial di esaki, mirando e importancia di e ley aki pa e consumidor, e comerciante y e clima di inversiona riba nos isla.
