Tratamento di cambio di ley di Serlimar, a bolbe confirma cu en realidad Minister di Infrastructura, Otmar Oduber, kier mira placa y mas placa, miyones e kier mira pasa bou capa di Serlimar y bay despues directamente pa un compania cu e minister ya caba tin cla pa cuminsa tuma over.
Miembro di fraccion di AVP, Benny Sevinger a mustra cu durante di e reunion Minister Oduber a trata di convence e fraccion di MEP den un forma unico, tratando di cumpli cu loke nan ta pidi, esta di saca diferente aspecto di e ley pero en realidad na final di cuenta, nada lo no cambia den e situacion cu su persona ta desea di mira.
“Nos por a scucha Minister den un forma determina trata di convence principalmente miembronan di fraccion di MEP, pa nan sostene e ley y cu e lo haci tur loke nan pidi y hast a bay asina leu na bisa cu e si nan kier, e lo saca e incinerator tambe for di e ley.
Bisa e no ta bisa cu hasta haciendo esaki, e plan di bin c’un incinerator ta keda vigente y hasta e proceso di un destaho publico, ta tumando luga mientras cu e reunion tabata tumando luga.
Tin hopi aspecto di e ley cu Minister ta mustra cu e por cambia pero hecho ta cu tur loke e kier mira cu e ley aki, pa placa drenta for di tur caminda, ya cu tur cos ta draai rond di placa.
Pa mustra un di e ehempelnan aki, ta cu intencion di e ley aki ta pa bay saca 4.2 miyon for di sector comercial bou di capa cu esaki lo ta entrada pa Serlimar pero aki e no ta bisa cu e placa aki ta bay caba finalmente na e compania cu e tin den mente pa duna permiso pa atende cu e procesamenteo di sushi.
Tampoco Minister Oduber a informa parlamento cu e 4.2 miyon aki cu e kier haya for di comercio, cu na final di dia ta pueblo ta esun cu lo tin cu paga e suma aki ya cu comerciantenan lo bay hinca esaki den e prijs di comestibelnan cu nan ta bende na pueblo, ya cu comercio kier cubri nan gastonan di e forma aki.
Pues ta pueblo lo tin cu bay paga e 4.2 miyon aki ora cu e momento yega caminda costo di bida lo sigui subi pa pueblo pero Minister Oduber ta haci como sifuera cu esey ta e solucion cu e kier mira pa asina complace cu su hendenan.
Na mes momento e mandatario a splica Parlamento cu for di hotel y condo’s e lo kier saca un suma adiciona di 7 miyon florin, cual placa tampoco lo bay pa Serlimar pero lo bay directamente pa e compania cu a wordo sigura cu e lo haya e negoshi di procesamento di sushi.
Pues tabata bisto cu loke e minister aki kier mira, ta placa drenta pa otro banco cu e ta trata di lanta, e biaha aki riba custia di Serlimar pero ningun caminda e por a demostra cu e placa aki ta keda pa Serlimar pero den e contract cu e compania, ta para con e proceso aki ta tuma luga.
E asina yama ‘tipping fee’ tin cu wordo paga tambe pa Serlimar na e compania aki mientras cu e companianan priva tambe lo tin cu bay paga e tipping fee aki, cual ta un suma di 120 florin.]
Pues tur hende cu ta haci uso di servicio di e companianan priva aki, cu ta pagando 25 florin na e momentonan aki, lo tin cu bay paga un suma adicional di 125 florin cu nan tin cu paga Serlimar, pues ta mas cu claro cu e clientenana ki lo no kier haci esaki y lo por termina nan contracto cu e companianan priva aki.
E consecuencia lo ta desastroso pa e companianan priva pero esey ya pa algun tempo caba, tur hende por a ripara cu Minister Oduber no ta kibra su cabes cu e companianan aki y nan trahadonan.
Miembronan di Parlamento por pidi pa haci cuanto cambio cu nan kier den e ley presenta pa e Minister pero ningun di e cambionan aki mag di mishi cu e fluho di placa cu e mandatario kier mira drenta den su banco cu e kier crea bou di capa di Serlimar,” Parlamentario Benny Sevinger a mustra.
