Minister Presidente Evelyn Wever Croes simplemente no ta perde su maya di papia mentira y mas mentira, caminda despues cu su persona y su gobierno a gaña henter pueblo di Aruba cu e lo tin solucion pa tur cos, el a bira impone medida riba pueblo, rancando miyones for di cartera di pueblo.
Melvin Tromp di partido AVP a mustra cu e mala maya aki di Minister Presidente a bira un tipo di vision of caracter politico di su persona y di su gobierno ya cu na varios ocasion caba, Hulanda mester a coregi declaracionnan di Evelyn Wever Croes.
“Diahuebs mainta tampoco tabata diferente ora cu for di diaranson anochi, a bira conoci cu Secretario di Estado Raymond Knops lo tene un conferencia di prensa pa 9.30 di mainta relaciona cu Aruba y covid-19.
Un biaha mas a resalta cu sr Knops en parti kier a clarifica ponencianan di Minister Presidente Evelyn Wever Croes, kende lo a declara cu su gobierno den negociacion cu Hulanda pero enfaticamente e mandatario Hulandes a bisa diahuebs mainta, cu no tin negociacion tumando luga.
Al contrario Hulanda a pone su condicionnan y ta keda na gabinete Wever Croes pa acepta esakinan pues no tin ningun cambio den e condicionnan cu ya ta existi pa algun siman caba y cu gobierno di Aruba ta bon na altura di nan.
Increibel con pa di tantisimo bes, Minister Presidente di Aruba tin cu wordo coregi pa un of mas mandatario Hulandes, no riba asuntonan directo pa loke a regarda interesnan di nos pais, pero pa e solo hecho cu Evelyn ta bisando cosnan cu no ta corecto y ta trata di baila pueblo di Aruba cu informacionnan cu no ta corecto.
Sinembargo ya caba gobierno Hulandes ta bon na altura di loke ta pasando aki na Aruba cu Prome Minister y su gobierno, ya cu ta mesun gobierno aki a firma un protocol na luna di november di 2018 y despues a bin hunga un otro rol cu tanto parlamento como pueblo di Aruba, cu esaki no tabata e caso.
Bou di hopi presion Prome Minister a haya su mes ta core bisa Hulanda cu e lo sigui cu ehecucion di e protocol aki, algo cu ainda e no a cumpli cune y awor Hulanda kier interveni pa percura pa ehecuta palabracionnan haci na 2018.
Loke Knops tabata falta pa bisa ta cu “Minister Presidente Evelyn Wever Croes is een leugenaar” ya cu ta constantemente tanto Knops como gobierno Hulandes ta haya nan mes ta coregi loke e lider di MEP ta informa comunidad.
Pa colmo siman pasa ser Knops hasta a bay asina leu na papia di e fenomeno crea pa partido MEP, esta di “friends and family” haciendo uso di e expresion politico aki cu pa hopi tempo MEP ta conoci pa esaki den tur ultimo 11 aña cu Aruba tabata wordo dirigi pa un gobierno di signatura di MEP.
Ta bon pa mustra aki cu ningun miembro di fraccion di AVP den ultimo tres aña a hiba un rapport Hulanda manera cu Evelyn y Xiomara a haci den pasado, ora cu nan a imprimi y parti varios copia di un rapport cu nan a yama ‘Feestvierend ten onder gaan.’
Awe Secretario di Estado Knops mes ta papia riba ‘friends and family’ den gobernacion di gobierno di MEP ya cu e pruebanan mes ta na alcansa pa nan mes mira y ripara, sigur e forma con famia y amigonan ta rondona Ministernan di gabinete Wever Croes,” Melvin Tromp di AVP a declara.
