“Un Gobierno tin e responsabilidad pa determina e saldo di entrada y gastonan irespectivamente di e aña”. Asina Parlamentario Richard Arends a motiva su voto diaranson anochi durante tratamento di e cuenta annual pa aña 2016.
“E intencion di e reunion aki tabata pa fiha e resultado di aña 2016 a base di investigacion di hechonan haci dor di Algemene Rekenkamer. E ley no tabata regarda aprobacion of desaprobacion di maneho,” el a sigui splica. Diaranson anochi partidonan den coalicion a desaproba e ley cu ta determina e saldo pa aña 2016, creando un kiebro den e ciclo di dunamento di cuenta despues di hopi esfuerso.
“Mi por tin diferencianan politico cu minister Ruiz-Maduro, pero mi ta di acuerdo cu su persona riba e importancia di e determinacion di un saldo pa por sigui cu e proceso di duna cuenta,” e parlamentario a splica. “Si bo no tin un saldo fiha pa aña 2016, bo no por entrega e cuenta anual di e añanan consecutivo.” Pa loke ta trata 2016, Algemene Rekenkamer ta conclui cu e deficit a mustra un mehoria fuerte compara cu 2015 y entradanan tambe a aumenta. “Nos ta papiando aki di un un reduccion di riba 230 miyon den 4 aña. Esaki lo mester a sigui pa un reduccion di 75 miyon mas na 2017 y un surplus di 25 na 2018,” Parlamentario Richard Arends a splica.
Te cu aña 2011 Aruba no tabata conoce un proceso di duna cuenta caminda cu e organo ehecutivo, sea Bestuurscollege of Gobierno, tabata determina e saldo.
Parlamentario Arends a splica cu na aña 2011 a inicia un proceso hunto cu Algemene Rekenkamer, Gobierno y Parlamento pa elimina e atrasonan den e cuentanan anual.
Gruponan di trabow a reuni regularmente pa a elimina e atrasonan existente den determinacion e saldo for di aña 1986 y prepara e infrastructura administrativo pa haci entrega di cuenta anual un proceso normal manera ta cu presupuestonan. Na aña 2013 a aproba un total di 50 cuenta anual, di cual 25 tabata coresponde na pais Aruba. E cuenta mas bieu ta regarda e cuenta di aña 1962 di teritorio insular di Aruba.
E minister a indica di lo manda e cuenta anual bek Algemene Rekenkamer. “Esaki lo no cambia nada den e hechonan cu nan a investiga caba, ni tampoco e cifranan. Contrario di fortifica posicion di e colegionan halto di estado, manda e cuenta anual bek lo atacha independencia di e colegio di estado aki y mina su autoridad.” Parlamentario Arends a splica.
For di oposicion siguramente nos a pone e diferencianan politico un banda y a atende e asunto aki na serio. “Awe nos ta bek na e situacion prome cu aña 2011 unda cu pais Aruba no por determina e saldo di aña 2016 y asina sigui cumpli cu e obligacion constitucional pa falta di boluntad y entendimiento di e materia. Esaki siguramente ta manda un señal completamente robes local y internacionalmente y ta limita e supervision financiero.
