Bou di un aplauso grandi, Jan Ebbing, a bisa cu “e lo duna di su parti pa na Hulanda pa promove e idea pa converti e Covid-debe di 900 miyon cu Aruba tin cu Hulanda den un Fondo di Inversion den e estilo di FDA pa inversionan duradero pa Aruba, manera Mike Eman a propone y ta lobby pe na Hulanda”,
Esaki Ebbing a expresa na e symposium riba e tema “Cooperacion strategico Aruba-Hulanda 2.0”. E prome director di TNO Aruba, Jan Ebbing, tabata e orador principal na e ocasion special aki cu por a conta cu un full house na Marriott Courtyard.
E symposio a pone como tema central e vision optimista y progresivo riba cooperacion strategico entre Aruba y Hulanda riba agenda politico atrobe. E “2.0” den e nomber ta referi na e periodo exitoso di cooperacion entre Aruba y Hulanda entre 2009 y 2017 bou liderazgo di ex Prome Minister di Aruba, sr. Mike Eman.
Sr. Jan Ebbing a repasa den su presentacion e éxito grandi cu TNO tabata durante e añanan cu e tabata estableci na Aruba. E a mustra cu TNO a worde atrae na Aruba dor di e tempo ey Promer Minister Mike Eman. Esaki entre otro pa asesora Aruba den su ambicion pa bira un isla green. Tambe Gabinete Eman tabata aspira e desaroyo di un econmoia di conocemento pa Aruba. Y emberdad cu TNO a logra di cuminsa exporta conocemento for di Aruba. Jan Ebbing a repasa un cantidad grandi di islanan y paisnan den region caminda TNO a cuminsa exporta conocemento cu profesionalnan di Aruba trahando na TNO.
Ebbing ta kere cu Aruba mester temporisa awor e cantidad di hotelnan y y enfoca riba infrastructura strategico y mantencion di e isla. E ta hopi preocupa cu e problema di dump y di Bubali waterzuiveringsinstallatie. Ebbing ta haya tambe cu desde 2017 pa awor Aruba a bira hopi sushi y ta mustra un falta di mantencion. E a mustra cu tin hopi reto na Aruba cu TNO a juda resolve y pa esunan actual un instituto manera TNO sigur lo por tabata hopi util.
Tambe Ebbing ta lamenta cu Aruba no tin e delantera mas den e tema di energia alternativa. Aruba tabata cana hopi dilant. Ebbing ta kere cu por pone e prioridadnan aki bek, tanto e ambicion pa un economia di conocemento como e ambicion pa ta un isla green. E a mustra con energia di biento y solo, cu Aruba tin di sobra, por worde utilisa pa produci “waterstof”. E a splica hopi cu ta confundi si y ta kere cu “hydrogen” ta un fuente di energia riba su mes, pero hydrogen mester di un fuente di energia pa e worde produci. Hustamente ora bo tin un exceso di energia, por ehempel di biento, bo por produci hydrogen y tene den stock pa ora mester energia cu no tin biento of solo. Tambe e splica cu por exporta “green hydrogen”, pasobra e ta worde produci cu energia alternativa, esta energia di biento of solo, locual ta hacie “green hydrogen”. Ta hopi importante pa Aruba bai enfoca atrobe riba energia alternativa, Ebbing a enfatisa. Prijs di electricdad ta afecta tur prijs y Aruba tin recursonan natural pa produci electricidad hopi barata, Jan Ebbing a subraya.
