A dura algun aña pero e soño politico grandi di Prome Minister Evelyn Wever Croes ta bay bira un realidad, esta cu Hulanda ta bin aki y anula autonomia finaciero di pais Aruba, segun Melvin Tromp di partido AVP.
Ta parce cu Evelyn Wever Croes a logra haya su gana pa entrega autonomia di nos pais na su compatriotanan Hulandes, mirando cu e tambe a nace na Hulanda.
Melvin Tromp a sigui mustra cu ta un berguensa di marca mayor despues di un lucha ferviente pa Status Aparte, awe yiu y sobrinda di Betico Croes, ta entregando esaki den man di e Hulandesnan, esta Glenbert y Evelyn
“Sin duda nos ta kere cu porfin Evelyn Wever Croes ta mira su soño y anhelo bira un realidad, esta cu Hulanda ta bin atende cu asuntonan financiero di nos pais, kitando un autonomia cu su difunto omo, Betico Croes a lucha asina hopi pa esaki.
Mientras cu Prome Minister a cuminsa un campaña caba riba rednan social pa schuif e asunto aki riba gobierno di AVP, simplemente e no por sconde of tapa e hecho cu e logro aki, ta un asunto cu pa hopi aña el a exigi di Hulanda pa haci esaki.
Pueblo por corda e tempo cu Prome Minister Evelyn Wever Croes y Minister di Finansa Xiomara Ruiz Maduro, a biaha pa Hulanda cu stapel di un raport cu partido MEP a hinca den otro y cu a carga e titulo di: “Feestvierend ten onder gaan,” cual el a trata di reparti na miembronan di Tweede Kamer y mandatarionan Hulandes.
Un rapport den cual e dos Ministernan aki tabata exigi Hulanda pa bin Aruba, pa impone un KB riba gabinete di Mike Eman, ya cu politicamente nan kier a saca probecho di esaki y awe nos pais ta cerca di haya un control total di Gobierno Hulandes riba finansa di nos pais.
Tur cos ta mustra y e forma con Prome Minister mes ta trahando dam pa wanta awa, e momento a yega pa Hulanda bay over na implementa e rapport aki di Evelyn, Xiomara y partido MEP pero manera semper, awe Evelyn kier hunga di victima, kier culpa otronan pa un fracaso total di su gobierno.
Fuera di e acto di traidor aki contra bo propio pais, Evelyn y su partido durante di campaña electoral pa eleccion di 2017, a priminti pueblo di Aruba, cu cosnan lo drecha cu MEP den gobierno, cu nan tin tur solucion pa atende cu finansa di nos pais.
No solamente e tin solucion cu lo beneficia pueblo, Evelyn y Xiomara y henter partido MEP a sigura pueblo cu nan lo soluciona finansa di e pais, SIN un solo medida ya cu tin un plan caminda e hende ta central y cu lo no tuma ningun tipo di medida impopular contra nos hendenan.
Tres aña den gobernacion, pueblo a wordo engaña practicamente tur dia ya cu Gabinete Wever Croes ta bay den historia politico di nos pais, como e gobierno cu a tuma mas medida contra pueblo, a bay over na aumenta e BBO, a tuma diferente otro medida cu a haci hopi daña financiero y economico pa henter e pais.
Poder di compra a bay atres, economia a stanca, haci negoshi a bira dificil y pa tres aña largo, pueblo no a haya algo positivo for di gobierno di Evelyn pero si mester a duna su gobierno mas di 260 miyon na medida, sin cu a haya algo al cambio.
El a priminti di baha prijs di awa y coriente, el a priminti di duna beneficionan na pueblo, a priminti di baha edad di pensioen, a sigura cu lo busca gas barata for di Colombia y cu su persona tin cantidad di compania di petroleo cu ta bay habri refineria na San Nicolas.
Ya Evelyn y su partido MEP manera semper nan a haci, a cera e refineria por completo, a absolve CITGO di mas di 300 miyon na pagonan cu nan mester a paga pais Aruba si dado caso nan no cumpli cu e contract firma.
Loke ta mas serio ainda, ta e hecho cu despues di a gaña henter un pueblo cu mal maneho y cantidad di medida, Prome Minister Evelyn a bay over na haci mes triki cu gobierno di Hulandes, a priminti cu e lo tuma medida pa baha gastonan di su gobernacion pero no kier a haci esaki.
Evelyn y Xiomara a firma un protocol na 2018 sigurando Hulanda cu nan lo retira centenares di trahadonan publico despues cu nan a aumenta gasto di personal den dos aña cu mas di 100 miyon florin.
Awe Hulanda ya no ta kere den Evelyn mas, gañado di pueblo, gañado di gobierno di Hulanda y ta mas cu claro cu gabinete Wever Croes no por sigui riba e rumbo aki di tuma gobierno di Hulanda pa kens.
Awe un RFT ta na caminda pa gabinete Wever Croes cu simplemente ta entregando autonomia financiero di nos pais na Hulanda, pa colmo despues cu Evelyn mes a gaña Hulanda cu e lo percura pa e ley di LAFT wordo aproba pa parlamento di Aruba manera cu a wordo palabra den e protocol di 2018,” Melvin Tromp di partido AVP a declara.
